Ish-kryeparlamentari i Kosovës, Jakup Krasniqi ka marrë fjalën shkurtimisht para Gjykatës Speciale, ku u paraqit për herë të parë dhe ai u deklarua i pafajshëm edhe pse këtë nuk ia kërkoi trupi gjykues.
Krasniqi e ka kritikuar ashpër cilësimin e Speciales si “ndërmarrje e përbashkët kriminale” kur përshkruajnë anëtarët e Shtabit të Përgjithshëm të UÇK-së.
“Në aktakuzë po na quani ndërmarrje e përbashkët kriminale. Unë deklaroj sot se kurrë në jetën time, në asnjë rast të vetëm nuk i kam trajtuar njerëzit as kaq, sa e si më trajtuat mua, nga ndërtesa e burgut e deri në këtë ndërtesë. E theksoj, s’kam trajtuar kurrë kështu njerëz”, ka thënë ndër tjerash Krasniqi.
“Cilësimi i prokuoririt se ne qendkemi ndërmarrje e përbashkët kriminale nuk ka asgjë më fyese”, ka theksuar Krasniqi.
“Besoj dhe besoj shumë që këtë e di secili qytetar i arsimuar që së paku është mbi 30 vjeçar dhe jeton në vendet e demokracisë”, tha Krasniqi.
Krasniqi ka thënë se ndarja e shqiptarëve në myslimanë dhe katolikë në aktakuzën e Prokurorit të Specializuar e ka ofenduar atë.
“Ju i ndajtët shqiptarët në mysliman dhe katolik. Unë nuk jam as mysliman as katolik, jam shqiptar”, tha Krasniqi.
Krerëve të UÇK-së, të akuzuar, Specialja thotë se kanë vepruar si ndërmarrje kriminale. Krasniqi pati disa fjalë edhe për këtë pjesë.
“Na quajtët ndërmarrje kriminale, për mua dhe shokët e mi që luftuam për liri nuk ka asgjë më fyese. Luftuam për liri dhe shtetndërtim, që i arritëm në bashkëveprim me SHBA, me BE-në, me NATO-n, me OKB-në të gjithë jemi së bashku ndërmarrje shtetndërtuesëe, ndërsa ndërmarrje kriminale është koka në Beograd dhe mbështetësit e Beogradit”, ka thënë ai.
“Unë kam qenë i dënuar nga regjimi serb, e ata më kanë dënuar pse kam lexuar libra, pse kam folur shqip. Besoni më shumë të drejtë kanë pasur ata se ju këtu”, ka shtuar ish-zëdhënësi i UÇK-së.
Ish-kryeparlamentari dhe ish-zëdhënësi i Ushtrisë Çlirimtare të Kosovës (UÇK), Jakup Krasniqi është emocionuar teksa ka folur në paraqitjen e parë para Gjykatës Speciale. Ai ka pasur kritika të ashpra për këtë gjykatë, derisa në jo pak momente emocionuese gjatë deklarimit të tij.
“Unë dhe populli im kemi mbajtë shumë padrejtësi dhe nuk kemi pasë nevojë për një tjetër padrejtësi”, tha Krasniqi, duke e ndërprerë fjalinë në gjysmë pas emocioneve.
“S’do të ndihesha mirë të isha në shërbim të politikave të krimit dhe gjenocidit të Serbisë”, theksoi Krasniqi.
I emocionuar, ai foli për përpjekjen e UÇK-së për çlirimin e Kosovës. Ai tha se Gjykata Speciale është adresa e akuza ndaj tij.
“Unë mendoj që adresa e qartë e krejt kësaj maskarade është në Beograd dhe mbështetësit e politikave të tyre kudoqofshin”, tha Krasniqi.
