“Jam paksa i acaruar”. Kryeministrit Edi Rama nervat ia ka ngritur kandidati i koalicionit “Bashkë fitojmë”, Fredi Bejleri, që, sipas tij, mashtron himariotët lidhur me çështjen e pronave.
“Vjen vërdallë dhe tregon përralla”, tha Rama.
Kryeministri shtoi se ka premtuar dhe do ta mbajë premtimin se vetëm ai mund ta zgjidhë këtë çështje: “Historia e pronave është zgjidhur. Ka ligjin, ka rregullat dhe njerëzit kanë filluar t’i marrin pronat siç u takon, por ka plot që nuk i kanë marrë akoma. Ama, u them një gjë: një garanci keni ju nëse nuk doni që t’ju ikin pronat për lesh. Mua dhe Partinë Socialiste në Tiranë. Nuk keni tjetër”.
Për çfarë ka ndodhur me Himarën, përgjegjësinë ia lë qëverisë së para 10 viteve: “Nuk ua solla unë njerëzit nga fundi i botës që të bëheshin pronarë këtu”.
Acarimi shoqëroi edhe gjuhën e kryeministrit, duke u treguar qytetarëve dy arsye se përse nuk duhet të votohet, siç tha ai, kandidati opozitar. Të parën e lidhi me inteligjencën: “Në Greqisht analfabet; në shqip, dru. Do më kërkoni mua të bashkëpunoj me atë?”.
Të dytën se është kandidat i Sali Berishës “non grata” dhe partnerit të tij në koalicion, Ilir Meta.
Ai pohoi se mes himariotëve kandidati socialist mund të mos gëzojë mbështetjen e duhur, por Rama tha se Gjergi Goro ka ndryshuar.
Votën e 14 majit në këtë zonë për kandidatin e tij e quajti votë për vashdimin e projekteve në Himarë.
