“Pandemia e COVID-19, theksoi kryeministri slloven, ka rizbuluar tensionin e fshehur deri më tani në sistemin ndërkombëtar”, tha kryeministri slloven Janez Jansha
“Ne e imagjinojmë Bashkimin Evropian si një hapësirë për lirinë e shprehjes, bashkëpunimin, standardet e larta të respektimit të të drejtave të njeriut dhe lirive themelore dhe sundimin e ligjit bazuar në kritere të barabarta për të gjithë dhe bashkëpunimin e institucioneve demokratike të zgjedhura nga populli”, tha kryeministri slloven Janez Jansha në fjalën e tij hyrëse të Forumit Strategjik të Bledit të mbajtur sot në Slloveni, raporton Anadolu Agency (AA).
“Ne e imagjinojmë Evropën në paqe me veten dhe në një mjedis paqësor dhe të begattë. Ne e shohim Evropën si pjesë të një Aleance të fortë Veriatlantike, si udhëheqëse botërore në aspektin e lirisë dhe cilësisë së jetës, si një shtëpi e drejtësisë dhe prosperitetit. Ne e imagjinojmë dhe e shohim një BE të bazuar në qytetërimin evropian. Ai është një Bashkim i fortë Evropian i përbërë nga shtete anëtare të forta, një Evropë e aftë të planifikojë dhe ekzekutojë një forcë të butë dhe fortë, një BE të zgjeruar me anëtarë të rinj nga Ballkani Perëndimor dhe fqinjësia lindore”, tha Jansha.
Sipas tij, pandemia e COVID-19 ka rizbuluar tensionin e fshehur deri më tani në sistemin ndërkombëtar.
“Është një luftë për qeverisjen globale. BE-ja është në krye të kësaj lufte. Por, për fat të keq jo gjithmonë si pjesëmarrëse, por edhe si skenë e kësaj lufte”, tha Jansha.
Ai theksoi se debati mbi të ardhmen e Evropës ka të bëjë me mësimin dhe mirëkuptimin.
“Kjo do të mundësojë arritjen e konsensusit dhe respektit të ndërsjellë, subsidiaritetit dhe solidaritetit. Mbi këtë bazë, BE-ja do të jetë në gjendje të përballet me sfidat e jashtme, gjë që nuk është e mundur nëse jemi të ndarë. Pra, debati mbi të ardhmen e Evropës është para së gjithash një debat rreth asaj se kush jemi dhe si e kuptojmë logon, patosin dhe etosin e kombeve evropiane. Shpresojmë se ka ardhur koha kur veprimi i BE-së mund dhe duhet të bëhet strategjik dhe afatgjatë, që synon arritjen e qëllimit të përcaktuar nga themeluesit e BE-së. Një Evropë e lirë, e tërë dhe në paqe me veten dhe rrethinat e saj”, tha Jansha.
Sot, BE-ja, tha Jansha, është krejt e ndryshme nga ajo që ekzistonte në kohën e pranimit të Sllovenisë dhe gjatë presidencës së parë sllovene të Këshillit të BE-së.
“Mund të themi se presidenca sllovene me Këshillin e BE-së në gjysmën e parë të vitit 2008 ishte presidenca e fundit që në asnjë mënyrë nuk u shënua nga një krizë e rëndë”, tha Jansha.
Forumi Strategjik i Bledit tradicionalisht bashkon udhëheqës të rajonit dhe shteteve anëtare të BE-së si dhe përfaqësues të institucioneve evropiane.
Përveç zyrtarëve të Sllovenisë të udhëhequr nga presidenti i shtetit Borut Pahor, në forum marrin pjesë edhe presidenti i Këshillit Evropian, Charles Michel, si dhe i dërguari special i Bashkimit Evropian për dialogun midis Beogradit dhe Prishtinës, Miroslav Lajçak.
Presidenti serb, Aleksandar Vuçiç, kryeministri i Shqipërisë, Edi Rama, kryeministri i Maqedonisë së Veriut, Zoran Zaev si dhe kryesuesi dhe anëtari i Presidencës së BeH-së, Zheljko Komshiç dhe Shefik Xhaferoviç, po marrin pjesë gjithashtu në Forumin Strategjik të Bledit.
