Barron Trump, djali më i vogël i ish-presidentit amerikan Donald Trump, ka kaluar verën duke u fokusuar në zgjerimin e bizneseve familjare, ndërkohë që romancat dhe jeta e natës, sipas burimeve, nuk i kanë qenë prioritet.
Sipas revistës People, 19-vjeçari nuk është shumë i interesuar për lidhje dashurore në këtë fazë të jetës, por preferon të marrë pjesë në takime me partnerë të mundshëm biznesi, pasi synon të nisë një sipërmarrje të re në fushën e teknologjisë. Thashethemet për një lidhje të mundshme u përhapën në maj, kur një burim anonim foli për një të dashur të supozuar, por lajmi nuk u konfirmua kurrë.
Aktualisht, Barron studion në Stern School of Business në Universitetin e Nju Jorkut dhe, sipas një burimi të afërt me të, takimet dhe jeta sociale nuk janë në fokusin e tij: “Besoj se për momentin kjo nuk është gjë e madhe për të. Ka detyrime në fakultet, një familje që e adhuron dhe është duke ndërtuar karrierën e tij”, tha burimi për People.
Në një intervistë për Vanity Fair, presidenti i klubit republikan në NYU e quajti Barronin “një çunak disi i veçuar në kampus”. Ai thuhet se nuk është shumë aktiv në jetën studentore, është i tërhequr dhe ka pasion video-lojërat. Fokusi i tij tek karriera mund të shpjegojë pse është parë rrallë në publik përkrah të atit që nga inaugurimi presidencial i janarit. Megjithatë, sipas burimeve, ai vijon të kalojë kohë me familjen larg syrit të medias.
Donald Trump duket se ka pritshmëri të mëdha nga djali i tij. Në një intervistë për Fox News në mars, ai e përshkroi Barronin si dikë me “aftësi të jashtëzakonshme në teknologji”, duke dhënë shembullin se ai “di si të ndizë kompjuterin e tij”.
“E fik laptopin e tij dhe i them ‘Mirë, mjaft për sot’. Kur kthehem pas pesë minutash, ai e ka ndezur sërish. E pyes ‘Si e bën këtë?’ Ai ka aftësi të pabesueshme për teknologjinë”, deklaroi Trump me seriozitet.
Përveç teknologjisë, Barron ka treguar interes edhe për fushën e pasurive të paluajtshme. Në vitin 2024, ai krijoi kompaninë Trump, Fulcher & Roxburgh Capital Inc., por e mbylli vetëm disa ditë pasi babai i tij siguroi mandatin e dytë presidencial, në mënyrë që të shmangte vëmendjen e tepruar mediatike.
Barron do të rikthehet më 3 shtator në Nju Jork, për të nisur vitin e dytë të studimeve në NYU. /Telegrafi/
