Presidenti amerikan Joe Biden ka mbërritur në Londër përpara funeralit të Mbretëreshës Elizabeth II të hënën.
Biden është në mesin e rreth 500 krerëve të shteteve dhe personaliteteve të huaja që mblidhen në Londër, në takim të liderëve botërorë që nuk është parë për dekada.
Nga Shtëpia e Bardhë sqaruan se vetëm Biden është ftuar dhe jo ish-presidentët e tjerë amerikanë.
Kryeministrat e Kanadasë, Australisë dhe Zelandës së Re ndodhen tashmë në Mbretërinë e Bashkuar.
Polemika rrethon disa nga të ftuarit, si Princi i Kurorës së Arabisë Saudite, Mohammed Bin Salman. Ftesa për të marrë pjesë në funeralin e Mbretëreshës ka shkaktuar një stuhi protestash nga aktivistët e të drejtave të njeriut. Një raport i deklasifikuar i CIA-s arriti në përfundimin se princi i kurorës kishte autorizuar vrasjen dhe copëtimin e gazetarit saudit Jamal Khashoggi brenda Konsullatës Saudite në Stamboll në vitin 2018.
Në funeralin e Mbretëreshës marrin pjesë kryeministri i Kanadasë Justin Trudeau, kryeministri i Australisë Anthony Albanese dhe kryeministrja e Zelandës së Re Jacinda Ardern, liderë të tjerë të Commonwealth që pritet të marrin pjesë përfshijnë kryeministrin e Bangladeshit Sheikh Hasina dhe presidentin e Sri Lankës Ranil Wickremesinghe. India do të përfaqësohet nga Presidenti Droupadi Murmu.
Presidenti francez Emmanuel Macron, Taoiseach irlandez Micheal Martin, presidenti gjerman Frank-Ëalter Steinmeier dhe presidenti italian Sergio Mattarella janë ndër liderët e tjerë botërorë që pritet të marrin pjesë.
Të pranishëm do të jenë edhe anëtarë të familjeve mbretërore nga e gjithë Evropa.
Mbretëresha Elizabeth II vdiq më 8 shtator. Ajo mbretëroi për 70 vjet, duke u bërë monarkja britanike që ka qëndruar më së gjati në fron.
