Shefi i qeverisë britanike, Boris Johnson, ka thënë se asnjë kryeministër nuk do të kishte të drejtë t’i pranonte kushtet tregtare të ofruar nga Bashkimi Evropian. Këtë deklaratë ai e bëri para se të nisej në Bruksel për zhvillimin e bisedimeve të reja.
I pyetur nga një anëtar i Partisë Konservatore në Dhomën e Ulët për mundësitë e marrëveshjes, Johnson tha: “Miqtë tanë në BE tash për tash janë duke këmbëngulur se nëse miratojnë një loigj të ri në të ardhmen të cilit ne nuk do t’i përmbaheshim, atëherë ata e duan të drejtën automatike për të na ndëshkuar apo për t’u hakmarrë.”
“Së dyti, ata po thonë se Britania duhet të jetë shteti i vetëm në botë që të mos e ketë kontrollin në ujërat e veta të peshkimit. Unë nuk besoj që këto janë kushte që një kryeministër i këtij vendi duhet t’i pranojë”, shtoi politikani i Partisë Konservatore.
I sfiduar nga lideri i partisë opozitare, kryetari i Partisë Laburiste, Keir Starmer, për rrezikun e mungesës së marrëveshjes nga 1 janari, kryeministri britanik pretendoi se Mbretëria e Bashkuara do të ishte magnet për investimet e jashtme, pavarësisht rezultatit, shkruan The Guardian.
“Do të ketë vende pune që do të krijohen në këtë shtet, në mbarë vendin, jo vetëm pavarësisht Brexit-it, por për shkak të Brexit-it. Vërtet, ky vend do të bëhet magnet për investimet e jashtme, vërtet tashmë është dhe do të mbetet i tillë”, tha Johnson para deputetëve.
