Kryeministri i Britanisë së Madhe, Boris Johnson, i ka urdhëruar ministrat që të përgatiten për gjasat e fuqishme për një Brexit pa marrëveshje me BE-në, pavarësisht thirrjes së zyrtarëve të lartë të Partisë Konservatore që të gjendet një zgjidhje për marrëveshje.
Pas një samiti treorësh me shefen e Komisionit Evropian, Ursula von der Leyen, gjatë të cilit nuk u përafruan qëndrimet, kryeministri britanik tha se është i gatshëm për një milje shtesë duke udhëtuar në Paris dhe Berlin për bisedime të drejtpërdrejta me liderët e BE-së.
Megjithatë, ai tha se oferta e tanishme e Bashkimit Evropian është e papranueshme për shkak se Britania e Madhe nuk mund të trajtohet si binjake e saj, shkruan The Guardian, transmeton Gazeta Express.
“Unë mendoj se duhet të jemi shumë, shumë të qartë. Tani është një gjasë e fuqishme – gjasë e fuqishme – që do të kemi një zgjidhje që është shumë më shumë si raporti i Australisë me BE-në sesa si raporti i Kanadasë me BE-në”, tha ai.
Qeveria britanike tha se kryeministri ka përkrahje të madhe nga kabineti për qëndrimin e tij, pavarësisht parashikimit se largimi nga BE-ja pa marrëveshje do ta dëmtonte ekonominë për 2 për qind të GDP-së, e cila tashmë është goditur rëndë nga pandemia.
Opsioni i Australisë është term që përdoret nga Kryeministri Johnson për tregtinë sipas rregullave të Organizatës Botërore të Tregtisë me BE-në, që do të thotë se taksat do të zbatohen mbi një varg të gjerë të mallrave.
