“Duhet të jemi shumë, shumë të qartë se ekziston tani një mundësi shumë e fuqishme, e përsëris, shumë e fuqishme që do të kemi një zgjidhje pak a shumë sikurse ajo e marrëdhënieve australiane me BE-në, apo si ajo kanadeze me BE-në”, ka thënë Johnsoni. “Nuk do të thotë se kjo është një gjë e keqe”.
Kryeministri Boris Johnson ka thënë të enjten se ekziston “një mundësi e fuqishme” që Britania e Madhe dhe Bashkimi Evropian të dështojnë në sigurimin e garancive të nevojshme për tregtinë e lirë pas përfundimit të vitit, një gjasë kjo që ka peshuar rëndë mbi funtin britanik si rrjedhojë e rrezikut të shtuar për ekonominë.
Blloku evropian dhe Britania kanë përplasje të thella lidhur me të drejtat për peshkim dhe për çështjet e tjera ekonomike, përkundër bisedimeve disamujore rreth marrëveshjes së re tregtare që do ta mbante tregtinë e lirë me vlerë prej trilionë dollarëve larg tarifave apo kuotave, duke nisur nga viti 2021.
“Duhet të jemi shumë, shumë të qartë se ekziston tani një mundësi shumë e fuqishme, e përsëris, shumë e fuqishme që do të kemi një zgjidhje pak a shumë sikurse ajo e marrëdhënieve australiane me BE-në, apo si ajo kanadeze me BE-në”, ka thënë Johnsoni. “Nuk do të thotë se kjo është një gjë e keqe”.
BE-ja, blloku më i madh tregtar në botë që përthekon 27 vende dhe 450 milionë konsumatorë, nuk ka një marrëveshje të tregtisë së lirë me Australinë.
Nën një skenar të tillë, Britania si ekonomia e gjashtë më e madhe në botë do të përballet me barriera tregtare të BE-së brenda tre javësh, kur e përmbyll periudhën transitore pas kompletimit të Brexit-it.
Johnsoni dhe shefja ekzekutive e BE-së, Ursula von der Leyen, nuk kanë arritur që t’i kapërcejnë ndasitë e vazhdueshme gjatë një takimi të darkës në Bruksel, të mërkurën.
Teksa ata u kanë ofruar kohë shtesë negociatorëve të tyre për konkretizimin e një marrëveshjeje dhe kanë deklaruar se do të vendosin për hapat e radhës deri në fund të javës, blloku ka shpalosur gjatë së enjtes planet për finalizimin e marrëdhënieve tregtare pas mesnatës së 31 dhjetorit.
Një veprim të tillë blloku e ka ndërmarrë si pasojë e drojës se vitin e ardhshëm mund të ketë kaos në trafikun ajror, atë rrugor dhe hekurudhor meqë bisedimet ndërmjet Londrës dhe Brukselit rrezikojnë të përfundojnë pa rezultat konkret.
Komisioni Evropian ka propozuar që Britania dhe BE-ja të vazhdojnë të ofrojnë qasje reciproke në ujërat për peshkim edhe një vit pas përfundimit të Brexit-it, me qëllim që të ulen tensionet që kanë shoqëruar negociatat për të ardhmen e raporteve tregtare. Britania i ka thënë më parë bllokut evropian se ka bërë lëshime të theksuara për të dalë prej rrugës pa krye të negociatave. Brexit-i është finalizuar zyrtarisht në janar, ndërsa sipas marrëveshjes së fazës transitore, Britania do të mbetet pjesë e tregut të përbashkët dhe doganave evropiane vetëm deri në fund të vitit.
Pa një marrëveshjeje të pas Brexit-it, udhëtarëve britanikë do të mund t’u ndalohet hyrja në vendet e BE-së, duke filluar nga 1 janari, pasi rregullat e udhëtimit që ndërlidhen me të qenit pjesë e BE-së skadojnë. Udhëtimet e pakufizuara nëpër shtete brenda bllokut më nuk do të aplikohen automatikisht për banorët e Britanisë nga atëherë. Kjo nënkupton që hyrja në BE do të bazohet më pas vetëm për udhëtime esenciale.
