Kryeministri britanik, Boris Johnson këmbënguli se po punon fort për të siguruar një marrëveshje për Brexit deri më 31 tetor, përpara bisedimeve vendimtare me presidentin e Komisionit Europian, Jean-Claude Juncker, që do të zhvillohen sot.
Johnson do të takohet me Juncker gjatë drekës, për herë të parë që nga marrja e detyrës si kryeministër, në fund të korrikut, pasi përpjekjet për të parandaluar një Brexit pa marrëveshje tregojnë shenja të pakta përparimi.
Johnson është zotuar të mos shtyjë datën e largimit të Britanisë nga BE, ndërsa refuzoi të pranojë kushtet e një marrëveshjeje të negociuar me Brukselin që synon zbutjen e tranzicionit.
“Nëse mund të bëjmë përparim të mjaftueshëm brenda ditëve të ardhshme, synoj të shkoj në atë samit të rëndësishëm të udhëheqësve të BE-së më datë 17 tetor dhe të përfundoj një marrëveshje që do të mbrojë interesat e biznesit dhe qytetarëve nga të dy palët”, shkruan Johnson në ”Daily Telegraph”.
Një burim anonim i qeverisë britanike tha se në takimin e tyre, në Luksemburg, vendin e lindjes së Juncker, Johnson do të sqarojë që nëse ofrohet një zgjatje tjetër për largim, ai do ta refuzojë.
Bisedimet do të zhvillohen në mes të një irritimi në rritje nga mungesa e propozimeve konkrete nga Londra.
“Nuk ka asnjë shenjë për një përparim”, tha dje një diplomat i BE-së për DPA-në./
