Jose Mourinho është trajner i ri i Tottenhamit në një kontratë që është e vlefshme deri në përfundim të sezonit 2023.
Ish-trajneri i Manchester Unitedit dhe Chelseat zëvendëson argjentinasin Mauricio Pochettino, i cili u shkarkua mbrëmë.
Negociatat ndërmjet Spurs dhe Mourinhos, i cili ka qenë i papunë që kur u shkarkua nga Unitedi, ishin intensifikuar ditëve të fundit dhe ato janë finalizuar mëngjesin e sotëm.
Në një prononcim të shkurtër, Mourinho tha se ishte i lumtur që po i bashkohet Tottenhamit, “një skuadër e fortë dhe me tifozë pasionantë”.
Ndërsa, Daniel Levy, kryesues i bordit të klubit, tha se Tottenhami ka arritur të sigurojë shërbimet e trajnerit më të suksesshëm në botë.
Ndeshja e parë e portugezit në drejtimin e Tottenhamit do të jetë të shtunën kur luan me West Hamin në “London Stadium”.
Pochettino e la Tottenhamin në vendin e 14 në kampionatin anglez duke fituar vetëm 5 ndeshje këtë sezon.
