Juristi Romeo Kara, i cili bëri kallëzimin në SPAK për aferën CEZ-DIA ka reaguar pas deklaratave të kreut të Partisë së Lirisë, Ilir Meta kur u thirr për të dëshmuar nga Struktura e Posaçme Antikorrupsion një ditë më parë.
Kara theksoi se është i gatshëm sa herë të thirret nga prokurorët e SPAK-ut. Ndërsa vuri në dukje se askush nuk mundet ta kthejë mbrapsht kallëzimin e tij.
“Janë mbi 15 orë kallëzime. Janë me detaje! Jam i gatshëm të shkoj sa herë të duan ata. Me kënaqësi sepse dua ta shoh rritet fuqia dhe efektiviteti i SPAK-ut.
Problemi është që nuk mundet asnjë njeri që të kthejë mbrapsht as atë kallëzim, as vullnetin tim”, u shpreh Kara .
Pasi ishte thirrur në SPAK për të dëshmuar për aferën CEZ-DIA, Ilir Meta tha një ditë më parë se kjo është një telenovelë që është gjykuar më parë dhe është rihapur nga një kallëzues i rremë duke iu referuar juristit Romeo Kara.
“Jam thirrur për telenovelën CEZ-DIA, është një telenovelë që është gjykuar nja dy herë, që është rihapur për rastin konkret në dhjetor 2019 nga një kallëzues i rremë që është dënuar 2 herë për shpifje dhe një herë për dhunë në familje”, tha Meta teksa i drejtohej derës së SPAK-ut.
Duke iu referuar kësaj deklarate, Kara vuri në dukje se ai nuk do të ndalet pavarësisht deklaratave të tilla dhe Ilir Meta, sipas tij, fshihet kot pas gishtit sepse nuk shpëton dot.
“Sado të përbaltem unë, me 8 milionë dënime, me çdo lloj të drejte penale, unë kam të drejtë të bëj kallëzim. Edhe po të dënohem nesër, sërish do të bëj kallëzim nëse do mundem. Kështu që zotëria fshihet kot pas gishtit, nuk është as teknikë juridike efektive për të, asgjë e keqe për mua. Kështu që ne do të vazhdojmë do të përballemi prapë”, nënvizoi Kara.
