Anëtari i kryesisë së Partisë Demokratike, Fatbardh Kadilli, tha sot se rezultati i zgjedhjeve për kryetarin e PD-së ishte i pritshëm, ndërsa theksoi se “ne do të duhet si PD dhe kryetari ti kërkojmë drejtimin, cili është drejtimi, do vazhdojmë të jemi po ajo parti apo do kemi një version të ri tek e ardhmja”.
Në një intervistë televizive Kadilli tha se “tendenca u duk që në fillim, gara ishte e pabarabartë. Mëse e kuptueshme që një kryetar që drejton prej 8 vitesh ka një marrëdhënie politike e emocionale, me anëtarësinë. Vjen pas një gare politike intensive, shto dhe pabarazitë, administrata, ne në Shqipëri nuk vëmë mend, për mua ishte e pritshme. E pranova si garë të pabarabartë. Më shumë se garë ishte sfidë. Unë i ktheva sadopak një garë PD”.
I pyetur përse i hyri kësaj gare, Kadilli u shpreh se “legjitimoj të menduarit, ndryshe, kritikë në parti. Partitë s’mund të jenë monolite. Për fat të keq shoqëria shqiptare nuk ka prodhuar ambientin për të krijuar alternativa në parti, janë ende klube orientale. Kjo është përpjekje për të oksidentalizuar PD-në”.
“Nuk është vetëm çështja kush e drejton partinë, normalisht ajo i vë vulën. Partitë tona dominohen nga kultura e njëshit, të fortit ku mblidhet gjithë energjia. E rëndësishme përtej kësaj është çfarë bën kryetari i zgjedhur me partinë. Sa i zoti është ta drejtojë në fitore”. Nëse dikush konfirmohet, ne duhet si PD dhe vetë kryetari ti kërkojmë drejtimin, cili është drejtimi, të jemi ajo parti që ishim apo do kemi një version të ri tek e ardhmja”, nënvizoi Kadilli.
Më tej Kadilli u shpreh se “kjo nuk është për një klub idesh, por secili të gjejë idenë dhe veten, secili demokrat të sjellë një ide. Këtë hapësirë politike ka shansin ta bëjë opozita shumë më tepër se mazhoranca. Basha nuk e ka bërë në dy mandatet e para, uroj ta bëjë në mandatin tretë”.
Kadilli tha se e pranon rezultatin, sepse nuk fshihet pas pabarazisë së garës.
“Gara ishte shumë e pabarabartë, e dukshme. Por, ajo është një garë e mbyllur. Çdo demokrat kishte një shans të zgjidhet dhe ata zgjodhën e janë përgjegjës për të. Në këtë moment unë nuk kam më punë me Bashën, por e kam me Ramën. Është detyrë e Bashës ta ketë veshin e hapur të dëgjojë, lëkurën e hollë të ndjejë, për t’iu përgjigjur qytetarëve. Vetëm në këtë rast ne do jemi një opozitë e re, që arrin shumë shpejt, ndoshta më 2025, pushtetin”, – tha Kadilli.
Edhe në mbledhjen e fundit të Kryesisë, vijoi ai, paraqita që manifesti im politik të merret parasysh, nga statuti, te ndryshimet e sjelljes brenda partisë.
“Unë kam qenë shumë i qartë, kur kam kërkuar ndryshim të kodit elektoral, Kushtetuta duhet ribalancuar, ndarja e re territoriale-administrative dhe reforma në drejtësi. Ne nuk mund të jemi në distancë me këtë reformë. Morali që i kërkoj unë sot Bashës është morali i antikorrupsionit. Antikorrupsioni luftohet në sistem, jo me retorikë, as me denoncime nga selia e PD, apo me protesta”, – tha Kadilli.
