Kalifornia në muajin e fundit është përballur me seri të zjarreve që kanë bërë shkrumb e hi mijëra hektarë tokë. Të premten, së paku dy shtëpi janë djegur në periferi të Los Angelesit.
Një numër i madh i zjarrfikësve janë angazhuar në lokalizimin e zjarrit që rrezikonte dhjetëra shtëpi të tjera. Autoritetet kanë bërë të ditur se zjarri ka nisur në orët e hershme të mëngjesit.
Kalifornia Jugore është në pikun e valës së të nxehtit dimëror, i nxitur nga thatësia dhe ajri i nxehtë. Disa lagje të shtetit amerikan janë urdhëruar që të evakuohen, ndërkaq janë mbyllur edhe shkollat.
Zjarrfikësit kanë thënë se zjarri në disa pjesë të Kalifornisë ishte deri në 4 hektarë. Helikopterët kanë hedhur ujë, ndërkaq automjetet për shuarjen e zjarrit janë vendosur afër lagjeve që po kërcënohen nga zjarret e mëdha.
Një pjesë e Kalifornisë gjatë vitit 1993 ishte përfshirë nga zjarri sezonal, duke djegur mijëra shtëpi.
