Policia e Shtetit ka shoqëruar në komisariat një të ri, pas lëvizjeve të dyshimta para godinës së Kuvendit, dhe përgjigjeve të dhëna për efektivët.
Ai ishte i veshur me të zeza, ndërsa mbante kapuç në kokë dhe një çantë të zezë, teksa bëri për rreth 30 minuta lëvizje të dyshimta para godinës së Kuvendit.
Në një moment ai nxorri nga çanta e tij një pistoletë çakmak dhe ndezi cigaren.
“Kam punë me doktorin, do e rrah në shpulla doktorin” – është dëgjuar i riu, i cili tashmë është ndaluar nga Policia.
Njoftimi i policisë Tiranë:
Tiranë/Informacion paraprak
Më datë 02.11.2023, rreth orës 12:45, është marrë njoftim se në afërsi të Kryesisë së Kuvendit, është konstatuar një shtetas, i cili përbënte shqetësim për qytetarët.
Shërbimet e Policisë kanë kaluar në vendngjarje dhe kanë marrë kontakt me shtetasin F. B., 41 vjeç, dyshohet me probleme të shëndetit mendor, të cilin e kanë këshilluar të largohet dhe më pas është larguar pa probleme.
