Në rajonin verilindor të Kinës, në zemrën e industrisë së saj minerare, ka nisur një revolucion teknologjik. Në minierën e Yimin-it, në Mongolinë e Brendshme, një flotë prej 100 kamionësh elektrikë pa shofer lëviz pa ndërprerje, duke transportuar qymyr me efikasitet dhe pa asnjë ndërhyrje nga njerëzit.
Projekti është zhvilluar nga gjiganti teknologjik Huaëei dhe grupi shtetëror Huaneng, duke u kthyer në vendosjen më të madhe të këtij lloji në sektorin minerar kinez. Kamionët “fantazmë”, siç janë quajtur, janë të pajisur me teknologji të avancuar: lidhje 5G-Advanced (5.5G), inteligjencë artificiale, hartografi me saktësi të lartë dhe kompjuterizim në cloud. Kjo u mundëson atyre të operojnë me vonesë minimale dhe saktësi maksimale, edhe në kushte atmosferike të vështira.
Kjo është vetëm faza e parë e një plani ambicioz. Huaneng synon të zgjerojë flotën në 300 kamionë brenda tre viteve, duke e vendosur Kinën si lider botëror në automatizimin e industrisë minerare. Aktualisht, në të gjithë vendin janë mbi 5.000 kamionë të tillë në funksion dhe deri në vitin 2026, kjo shifër pritet të dyfishohet.
Ndërkohë, një projekt paralel po zhvillohet në minierën Zaha Naoer, gjithashtu në Mongolinë e Brendshme, ku 135 kamionë autonomë me rreze të zgjatur operojnë çdo ditë. Këta përdorin një sistem të kombinuar 4G dhe 5G dhe kontrollohen përmes një platforme cloud, duke garantuar reagim në kohë reale.
Përfitimet janë të dukshme: janë ulur ndjeshëm kostot dhe rreziqet për jetën e punëtorëve. Janë reduktuar 325 vende pune në kabinë dhe kursimet mujore kapin shifrën e katër milionë juanëve. Teknologjia e re po transformon minierat kineze, më pak njerëz, më shumë efikasitet dhe siguri.
