Në takimin me drejtuesit e Policisë së Shtetit, Ministri i Brendshëm Taulant Balla nuk i kursyer kritikat, duke theksuar prerazi se nuk do të ketë më tolerime.
Ndalur te kultivimi i kanabisit, Balla tha se kjo vijon të ndodhë në territorin e vendit për shkak se ka ende policë apo shefa komisariati që paguhen nga trafikantët.
“E kam vlerësuar si deputet deri dje dhe nuk kam si të mos e vlerësoj me respekt si ministër sot, përpjekjen kolosale të bërë deri më tani nga Policia e Shtetit kundër kultivimit të lëndëve narkotike, por s’kam sesi të mos ju kërkoj sot që kjo luftë të vazhdojë edhe më fort, përderisa përsëri e përsëri, tek apo tuk, kanabisi rinxjerr kokën sapo policia e kthen kokën nga ana tjetër. Ndaj ju lutem, mos të më thotë askush se një rrënjë kanabisi e ka një shans të rritet, pa një polic që paguhet për të mos e parë dhe se një parcelë kanabisi e ka një mundësi të vetme të korret, pa një shef komisariati që paguhet nga trafikantët për të mos e shkulur”, tha Balla.
Sipas kreut të Ministrisë së Brendshme, lufta kundër korrupsionit duhet të nisë fillimisht brenda Policisë së Shtetit, duke vënë në pikëpyetje rezultatet e Agjencisë së Mbikëqyrjes Policore. Sikurse tha Balla, janë goditur shumë “keqbërës të vegjël” nën uniformë, por jo “keqbërës të mëdhenj”.
“Lufta kundër korrupsionit nuk nis jashtë nesh, por së pari brenda radhëve tona. Agjencia e Mbikëqyrjes Policore është krijuar me një ligj të punuar bashkë me partnerët tanë ndërkombëtarë, në parlament e kemi konsideruar si një ligj të rëndësisë së veçantë, të cilin e njoh mirë dhe e kam mirë parasysh sa pritshmëri kemi pasur kur e kemi miratuar këtë ligj. Pyetja ime kaq kohë pas krijimit të Agjencisë si një derivat i SHKB-së së dikurshme, sa drejtues a shefa komisariatesh të Policisë së Shtetit janë kapur me presh në duar? Nuk i vë në diskutim këtu rezultatet e agjencisë, të kuptohemi qartë, por ama nuk mund të mos vë në diskutim faktin se pas statistikave të saj qëndron e vërteta se janë goditur shumë keqbërës të vegjël nën uniformë, por keqbërës të mëdhenj më shumë se sa pak, për të mos thënë aspak!”, u shpreh ai.
