Kancelari austriak, Sebastian Kurz u shpreh i shqetësuar për sulmin terrorist në Vjenë.
Në një konferencë për media, Kurz tha se nuk duhet të frikësoheni nga terroristët.
“Ne do të hetojmë, gjurmojmë dhe do të sjellim autorët e krimit, mbështetësit dhe njerëzit e tyre me të njëjtin mendim,” deklaroi kancelari.
Sipas kancelarit austriak, lufta kundër ekstremizmit dhe terrorizmit do të zhvillohet së bashku me partnerët ndërkombëtarë.
“Të bashkuar nga sundimi i ligjit, demokracia jonë liberale dhe vlerat tona themelore, ne qëndrojmë krah për krah për të mbrojtur paqen në Austri, në Evropë dhe në të gjithë botën,” tha Kurz.
Sipas Kurz, sulmi ishte motivuar qartë nga ekstremizmi islamik, shkruan gazeta “Kronen”.
“Ishte një sulm nga urrejtja, nga urrejtja për vlerat tona themelore, nga urrejtja për mënyrën tonë të jetës, nga urrejtja për demokracinë tonë. Armiku ynë, ekstremizmi islamik, i cili drejtohet kundër të gjitha vlerave tona dhe kundër kushtetutës sonë, jo vetëm që dëshiron të shkaktojë vdekje dhe vuajtje – ai gjithashtu dëshiron të ndajë shoqërinë tonë. Dhe ne nuk do ta lejojmë që të ndodhë. Ne nuk do t’ua japim hapësirën e tyre të urrejtjes”, tha Kurz.
Ai shtoi se kjo nuk ka të bëjë me një mosmarrëveshje midis të krishterëve dhe myslimanëve ose midis austriakëve dhe migrantëve. Bëhet fjalë për një luftë midis civilizimit dhe barbarisë.
“Dhe ne do ta luftojmë këtë luftë me gjithë vendosmëri. Dhe të gjithë ata që kanë diçka të bëjnë me këtë do të ndiqen penalisht”, tha ai.
Deri tanipesë persona kanë vdekur nga sulmi që u krye në mbrëmjen e së hënës në Vjenë, përfshirë njërin nga sulmuesit.
