PS ka depozituar në Kuvend kërkesën me 55 firma për të shkarkuar Presidentin Ilir Meta.
Kreu i Grupit Parlamentar i Partisë Socialiste Taulant Balla doli sot në një konferencë për mediat, ku ka konfirmuar zyrtarisht kërkesën për shkarkimin e presidentit Ilir Meta, e cila sipas tij është dorëzuar sot në Kuvend.
Sipas Ballës, anulimi i datës 30 qershor dhe mos caktimi i një date tjetër, i mohon të drejtën sovranit për të qenë i tillë dhe ky është një hap që zhbën autoritetin sovran. “Nëpërmjet këtij akti të Presidentit,-tha deputeti i PS-së,- është shënuar dalja përtej kompetencave”.
Gjatë fjalës së tij, deputeti Balla tha se Presidenti i Republikës, në ushtrim të kompetencave të dhëna nga Kushtetuta ka nxjerrë dekretin për caktimin e datës së zgjedhjeve të qeverisjes vendore, që është 30 qershori.
“Në përmbushje të realizimit të zgjedhjeve janë ngritur KZAZ, përgatitur dhe shpallur listat e zgjedhësve, është kryer regjistrimi i partive, janë depozituar listat e ka filluar fushata. Ndërkohë që ka filluar procedura zgjedhore presidenti ka nxjerrë dekretin për shfuqizimin e zgjedhjeve më 30 qershor 2019.
Arsyet e dhëna nga Presidenti kanë të bëjnë me shqetësimin e thellë për situatën politike, se kushtet aktuale s’do siguronin zgjedhje të vërteta gjithëpërfshirëse, bindjen se kjo është mënyra që ndihmon në zgjidhjen e krizës dhe se mbështetet në Kushtetutë. Kjo bie në kundërshtim të hapur me parimet kushtetuese. Së pari është cenuar rëndë parimi i ushtrimit të sovranitetit nga populli. Sovraniteti i takon popullit e ushtron në mënyrë të drejtpërdrejtë ose nëpërmjet të zgjedhurve të tij.
Në këtë kuptim i ka hequr sovranit të jetë i tillë. Anulimi i datës 30 qershor dhe mos caktimi i një date tjetër mohon të drejtën e sovranit për të qenë i tillë. Kjo është një hap që zhbën autoritetin sovran. Nëpërmjet këtij akti të Presidentit është shënuar dalja përtej kompetencave. Sovrani ka përcaktuar se kur do të mbahen zgjedhjet”, -tha Balla.
Sipas Ballës, më aktin e anulimit të zgjedhjeve, Presidenit i ka marrë kompetencat e sovranit, të parashikuar në kushtetutë.
Kryetari i grupit parlamentar të PS argumentoi se kërkesa për shkarkim do të vlerësohet nga një komision i posaçëm hetimor. Më pas do të shkojë në Kuvend dhe në rast se merr 94 vota, do t’i kalohet Gjykatës Kushtetuese, e cila do të japë edhe fjalën e fundit për shkarkimin ose jo të Presidentit.
Balla i kujton Presidentit “që mos na turpërojë duke ulur nivelin e presidencës së tij në kufirin minimal të etikës shtetërore sa herë i jepet mundësia të hapë gojën.”
