Kërcënimet nga Irani ishin në fokus të mbledhjes së Këshillit të Sigurimit Kombëtar, të thirrur nga Presidentit Bajram Begaj, me drejtuesit më të lartë të institucioneve në vend. Temë kryesore ishte mbrojtja kibernetike, një vit pas agresionit në portalet qeveritare dhe shtetërore, por A 2CNN ka mësuar se në mbledhjen me dyer të mbyllura, Drejtoria e Antiterrorit dhe Shërbimi Informativ ka ngritur alarmin se kërcënimet nga Irani ndaj kampit Ashraf të vendosur në Manzë mund të përshkallëzohen edhe në sulme fizike apo terroriste.
Edhe Presidenti Begaj, në nisje të mbledhjes, nënvizoi se kërcënimet nga Irani nuk janë vetëm të natyrës kibernetike.
“Në këtë takim të sotëm, krahas sigurisë kibernetike ne do të diskutojmë edhe për çështje të tjera me rëndësi për sigurinë kombëtare, të cilat janë kryesisht të lidhura me kërcënimet që vijnë nga Irani, qofshin këto në formën e propagandës, kërcënimeve diplomatike apo me natyrë hibride”, u shpreh Begaj.
Përpjekje për sulme terroriste ndaj kampit të muxhahedinëve në Manzë ka pasur edhe në të shkuarën, por ato kanë dështuar. Për arsye sigurie një vit më parë u anulua samiti botëror i Muxhahedinëve që do të mbahej në Shqipëri.
Pasi kreu i Shtetit është njohur me informacionet më të fundit nga SHISH dhe Antiterrori, një njoftim i shpërndarë nga Presidenca në përfundim të mbledhjes së Këshillit të Sigurimit, nënvizon nevojën që Shqipëria të rrisë edhe kapacitetet e mbrojtjes ajrore.
“Institucionet të bëjnë vlerësimin e kërcënimit dhe rrezikut dhe do të marrin masa për forcimin e kapaciteteve të mbrojtjes kibernetike, mbrojtjes ajrore, forcimit të strukturave të inteligjencës për grantimin e sigurisë kombëtare”.
Gjithashtu, Presidenti i Republikës u kërkoi drejtuesve të institucioneve në vend që të informojnë në mënyrë periodike edhe partnerët ndërkombëtar lidhur me çdo kërcënim që vjen nga Irani.
