Kongresmeni nga Florida, Mike Waltz, i cili do të bëhet këshilltar për sigurinë kombëtare i presidentit të sapozgjedhur të SHBA-së, Donald Trump, ka bërë disa deklarata rreth luftës në Ukrainë.
Në një deklarim për kanalin televiziv “Fox News”, ai e përshkroi luftën e Rusisë kundër Ukrainës si një “mulli mishi” dhe e krahasoi atë me luftën e llogoreve të Luftës së Parë Botërore.
Ndërsa kur është pyet për të komentuar vendimin e administratës së Joe Biden për të lejuar Ukrainën të përdorë mina tokësore kundër personelit, Waltz iu referua atyre si “mina të zgjuara”, por theksoi se vendimi duhet të jetë pjesë e një strategjie më të gjerë për t’i dhënë fund konfliktit.
Sipas tij, ajo ngjason me betejën e llogoreve gjatë Luftës së Parë Botërore.
“Presidenti Trump është jashtëzakonisht i shqetësuar për masakrën që po ndodh atje (dhe) se si të rivendosim parandalimin dhe të sjellim paqen”.
Waltz shtoi se evropianët duhet të luajnë një rol qendror në këtë proces.
Kujtojmë se Trump është shprehur vazhdimisht se do t’i jepte fund luftës Rusi-Ukrainë, madje, përpara se të inaugurohej si presidenti i 47 i Shteteve të Bashkuara.
Por ai nuk ka deklaruar se si do ta bënte një gjë të tillë dhe gjatë debatit presidencial në muajin shtator nuk pranoi të shprehej nëse ai dëshironte që Ukraina të fitonte luftën.
Gjithashtu kujtojmë se presidenti Joe Biden hoqi kufizimet ndaj Ukrainës duke e lejuar që të lëshonte raketa amerikane me rreze veprimi deri 300 kilometër, në thellësi të Rusisë, në përgjigje të dislokimit të 10 mijë trupave koreanoveriore për të luftuar krahas forcave të Moskës.
Dy ditë më vonë, Kievi vuri si objektiv me këto raketa, depot e armëve në rajonin rus Briansk.
Më pas, presidenti Vladimir Putin lëshoi një raketë të re eksperimentale duke vënë në shënjestër rajonin Dnipro, në lindje të Ukrainës.
Lidhur me këtë, “është qartazi pëshkallëzim”, tha zoti Waltz, shkruan VOA. “Ku po shkon ky përshkallëzim? Si mund t’i ulim të dyja palët në tryezë për bisedime për paqe?”.
Waltz, posti i të cilit nuk ka nevojë të konfirmohet nga Senati, tregoi se ka patur takime me Jake Sullivan, këshilltarin për siguri kombëtare të Presidentit Biden.
Këshilltarët e sigurisë kombëtare të Presidentit të zgjedhur Donald Trump dhe Presidentit Joe Biden në largim, po punojnë ngushtë për të krijuar një front të bashkuar përballë kundërshtarëve të Shteteve të Bashkuara gjatë periudhës së ndryshimit të udhëheqjes në Shtëpinë e Bardhë, tha të dielën Mike Waltz.
“Për kundërshtarët tanë që mendojnë se kjo periudhë është moment mundësish, që ata mund të vënë njërën administratë kundër tjetrës, ata gabohen”.
