Disidenti rus Mikhail Khodorkovsky, ish-oligarku i Rusisë dhe kritiku i ashpër i Kremlinit e ka krahasuar presidentin rus Vladimir Putin me “një lojtar kumari që shpreson gjithmonë se karta tjetër do të jetë ajo fituese”.
Khodorkovsky argumenton se për liderin e Kremlinit konflikti është bërë një nevojë politike thelbësore, pasi Vladimir Putin ka braktisur prej kohësh pragmatizmin e ditëve të tij të para në pushtet dhe tani për të, Donbasi është çështje ideologjike, parimore dhe gjithashtu mbijetese në pushtet.
Ai ka pak optimizëm për një fund të shpejtë të luftimeve, duke shpjeguar se Putin do të tentojë ë arrijë përparime ushtarake siç nuk ia ka dalë në këto katër vjet sulmesh.
“Propaganda e tij ka shkuar shumë larg për të bërë lëshime”, thotë ai në një intervistë për “La Stampa”, duke shtuar se, pavarësisht interesave ekonomike, “konflikti tani luhet në një nivel tjetër. Edhe Zelensky nuk mund të dorëzojë territore pa shkaktuar një krizë dramatike në Ukrainë, si institucionale ashtu edhe sociale”.
Khodorkovsky e krahason presidentin rus me një lojtar kumari që “shpreson gjithmonë në kartën tjetër fituese” dhe që “po e bën këtë edhe tani me Trump-in”, duke theksuar se Rusia herët a vonë do të duhet të përballet me një ekonomi në prag recesioni dhe mungesë ushtarësh e fuqie punëtore civile.
Sa i përket zgjidhjeve për një armëpushim, disidenti sugjeron se rruga e vetme realiste është shndërrimi i zonave të kontestuara në zona të çmilitarizuara, sepse “përndryshe nuk ka rrugëdalje”. Ai propozon që “një zonë ndalim-fluturimi mbi territoret e çmilitarizuara do të ishte një pengesë besueshme edhe për Moskën”.
Paralajmërimi më i ashpër i ish-shefit të Yukos-it është drejtuar drejtpërdrejt demokracive perëndimore: “Putin do të tundohet përsëri të bërtasë për emergjencën e armikut te portat. Dhe në kufijtë e Rusisë jeni ju, evropianët”, duke kritikuar mungesën e gatishmërisë së kontinentit për t’u mbrojtur.
Sipas Khodorkovsky-t, “ju evropianët nuk keni më mentalitetin e atyre që janë gati të mbrojnë kombin e tyre”, dhe ky qëndrim interpretohet nga Kremlini “vetëm si dobësi”.
