Një mal problemesh e ka cilësuar nivelin e korrupsionit në Shqipëri ambasadorja e SHBA-ve në Tiranë Yuri Kim.
Gjatë fjalës së saj në konferencën antikorrupsion, ambasadorja e SHBA-ve tha se është e nevojshme që të goditet korrupsioni, pasi kjo është mënyra e vetme për të sjellë drejtësi të re në vend dhe për të fituar besimin e popullit shqiptar. Kim tha se SHBA-të do të vijojnë të mbështesin reformën në drejtësi dhe orvatjen e shtetit shqiptar për ta ‘ngjitur’ malin e korrupsionit.
Yuri Kim:
“Kur shikoj reformë në drejtësi në Shqipëri është një çështje ku duhet të vendosësh një këmbë para tjetrës. Korrupsioni ka një mal me probleme në Shqipëri. Kjo është larg një deklarate fitoreje por është një çast për të ndaluar dhe për të festuar. Është pozitive që Shqipëria vazhdon të luftojë. SHBA është e përkushtuar për një të ardhme të begatë të Shqipërisë. Ne kemi nevojë për një aleat që është në gjendje të bëjë pjesën e saj. Një nga mënyrat për të rrënjosur optimizmin është të punosh në emër të qytetarëve dhe jo në emër të interesave të ngushta.
Qytetarët kanë nevojë që paratë e tyre të investohen për përmirësimin e jetës së tyre. Të gjitha qeveritë vuajnë nga një nivel korrupsioni. Qeveritë mund të dënojnë ata që bëjnë korrupsion, mund të dënojnë ata që përdorin postin publik për të pasuruar veten apo partitë e tyre. Policia, prokurorët dhe gjyqtarët e pavarur janë thelbësorë për një qeverisje të mirë. Do të ketë gjithmonë aktorë të këqinj por qeveritë duhet t’i dënojnë. Duhet treguar që qeveria është në kahun e njerëzve., Shqipëria ka filluar në këtë rrugë hap pas hapi dhe reforma në drejtësi po tregon rezultate. Greco tregoi përparim. Kjo nuk është deklaratë fitore. Nëse Shqipëria vazhdon në këtë rrugë do të ketë fitore në vazhdim. Ambasada e ka bërë plotësimin e SPAK një prioritet. Mbetemi të përfshirë duke ofruar trajnime. Ne presim të shohim më shumë rezultate, të cilat janë të nevojshme për ju dhe të ardhmen tuaj. Jemi krenarë që jemi krah jush“.
Ambasadori i delegacionit të BE-së në Tiranë Luigi Soreca, foli në të njëjta vija me Kim, duke thënë se është e nevojshme që të goditen rastet e korrupsionit në nivelet e larta. Soreca foli për dënime të formës së prerë të zyrtarëve të lartë, si shenja të përmirësimit të një sistemi drejtësie.
Soreca ka folur po ashtu për vettingun, numrin e lartë të magjistratëve të larguar, por një theks ka vënë dhe në faktin se BE është e shqetësuar për shtrirjen e madhe të korrupsionit në Shqipëri.
“Kemi para një sërë dënimesh për zyrtarë të nivelit të ulët dhe të mesëm. 60% e magjistratëve që i janë nënshtruar vettingut nuk e kanë kaluar.
Ka përparime të disa institucioneve të reja në drejtësi, prokurori i përgjithshëm, SPAK. Kemi drejtuesen e BKH. Roli i ILDKPKI është shumë i rëndësishëm për kontrollin e pasurisë. Pavarësisht kësaj, korrupsioni vazhdon të mbetet i shtrirë gjithandej dhe vazhdon të jetë shqetësim serioz për BE dhe shtetet anëtare. Duhen dënime të formës së prerë për zyrtarë të lartë që kanë qenë tepër të ulëta.
Qytetarët duhet të kuptojnë se askush nuk mund të qëndrojë mbi ligjin. Kemi shpresa te SPAK dhe gjykatat. Është premtuese që kanë nisur hetimet për 23 magjistratë të shkarkuar nga vettingu, pjesë e Gjykatës Kushtetuese dhe Gjykatës së Lartë. Hapa pozitivë janë ndërmarrë por lufta duhet të vazhdojë.
BE ka investuar më shumë se 20 mln euro për drejtësinë. BE është dakord me përfundimet e GRECO. Por lufta kundër korrupsionit është një luftë e gjithë shoqërisë dhe do të jemi fitimtarë nëse të gjithë përpiqemi së bashku”.
