Vendimi i Presidentit Trump për të ndërprerë fondet që SHBA jep për Organizatën Botërore të Shëndetit në mes të pandemisë së koronavirusit, është kritikuar gjerësishtë në të gjithë botën.
Një ndër reagimet e para ishte ai i kreut të OKB-së, Antonio Guterres, sipas të cilit tani nuk është koha e duhur për reduktimin e financimeve për shkak të pandemisë koronavirus.
“Tani është koha për unitet dhe për komunitetin ndërkombëtar që të punojë së bashku në solidaritet për të ndaluar virusin dhe pasojat shkatërruese të tij”, Sekretari i Përgjithshëm i OKB-së.
Kritika e tij u ndoq nga ajo e Bill Gates i cili e konsideroi të rrezikshëm vendimin e Presidentit të SHBA.
“Ndërprerja e fondeve për Organizatën Botërore të Shëndetësisë është po aq e rrezikshme sa ç’duket. Puna e tyre po frenon përhapjen e COVID-19 dhe nëse puna e tyre ndërpritet asnjë organizatë tjetër nuk mund t’i zëvendësojë. Bota ka nevojë për OBSH-në tani më shumë se kurrë” shkruan Gates në profilin e tij në Tëitter.
Zërave kritikë iu bashkua edhe Kina e cila ishte përshëndetur në fillim nga Trump për punën e bërë në izolimin e koronavirusit.
Një zëdhënës i ministrisë së jashtme tha se Kina ishte “seriozisht e shqetësuar” për vendimin, për të cilin ai tha se erdhi gjatë një “momenti kritik” në pandemi.
Gjermania gjithashtu është shprehur kundër vendimit të SHBA. Ministri i Jashtëm Heiko Mass tha se “hedhja e fajit nuk ndihmon” në këtë kohë kur jemi në mesin e një pandemie dhe OBSH shihet si organi koordinues për marrejn e masave për parandalimin e saj në gjithë botën.
Ai shtoi se një nga mënyrat më të mira për të punuar për të ndaluar përhapjen e virusit ishte forcimi i OKB dhe OBSH në zhvillimin dhe shpërndarjen e testeve dhe vaksinave.
Shefi i politikës së jashtme të BE-së, Josep Borrell, tha se e priti “me keqardhje të thellë” këtë veprim, duke shtuar: “Nuk ka asnjë arsye që të justifikojë këtë veprim në një moment kur përpjekjet e tyre janë të nevojshme më shumë se kurrë për të ndihmuar në kontrollin dhe zbutjen e pandemisë së koronavirusit.“.
Më vonë pritet që Drejtori i Përgjithshëm i OBSH-së, Tedros Adhanom të shpreht në lidhje me këtë veprit të Presidentit Trup i cili cënon pothuajse 15% të buxhetit të përgjithshëm të OBSH-së. Nga ana tjetër ky institucion aktualisht është organi kryesor që siguron ndihma për shumicën e vendeve të varfra në botë të cilat janë më të ekspozuarat nga koronavirusi. Diirektivat e OBSH kanë shërbyer gjithashtu si bazë e planeve të qeverivë për të masat e marra për parandalimin e përhapjes së virusit. /Opinion.al
