Kina dhe Rusia do të zhvillojnë stërvitje të përbashkëta ushtarake këtë vit, konfirmuan gjeneralët e lartë nga secila palë në një takim virtual të premten, sipas ministrisë së mbrojtjes së Kinës .
Shefi i Departamentit të Shtabit të Përbashkët të Komisionit Qendror Ushtarak të Kinës zhvilloi një videotakim me Valery Gerasimov, shefin e Shtabit të Përgjithshëm të forcave të armatosura ruse.
Takimi u mbajt për të “shkëmbyer pikëpamjet për zbatimin e konsensusit të dy krerëve të shteteve dhe thellimin e bashkëpunimit midis dy ushtrive”, tha ministria e mbrojtjes e Kinës.
Më 6 qershor, Kina dhe Rusia zhvilluan stërvitje të përbashkëta të forcave ajrore mbi Detin e Japonisë, i njohur gjithashtu si Deti Lindor.
Ky bashkëpunim vjen pasi tregtia dypalëshe midis Rusisë dhe Kinës arriti në më shumë se 93.8 miliardë dollarë nga janari deri në maj të vitit 2023, një rritje prej 40.7% krahasuar me të njëjtën periudhë të vitit të kaluar, treguan të dhënat nga Administrata e Përgjithshme e Doganave të Kinës.
Rusia është goditur nga sanksione të pashembullta perëndimore që kur pushtoi Ukrainën dhe është përjashtuar nga pjesa më e madhe e ekonomisë globale.
Kina, e cila e sheh Rusinë si një partner kyç dhe pikë të rëndësishme mes tensioneve të saj në rritje me Perëndimin ka refuzuar të dënojë pushtimin e Ukrainës nga Moska ose të bëjë thirrje për tërheqjen e trupave ruse nga territori i Ukrainës, edhe pse miliona janë zhvendosur dhe dhjetëra mijëra vrarë në sulmin e paprovokuar të Kremlinit në vend, sipas CNN.
