Pekini ripohoi të mërkurën kërcënimin e tij për të përdorur forcën ushtarake me qëllim vënien nën kontroll të Tajvanin vetëqeverisës, mes stërvitjeve ushtarake kineze në shkallë të gjerë që kanë rritur tensionet në nivelin më të lartë në vite.
Deklarata e lëshuar nga Zyra e Çështjeve të Tajvanit të Kinës dhe departamenti i saj i lajmeve pasoi pothuajse një javë sulmi me raketa dhe inkursione në ujërat dhe hapësirën ajrore të Tajvanit nga anijet luftarake kineze dhe avionët e forcave ajrore.
Veprimet kanë ndërprerë fluturimet dhe transportin në një rajon vendimtar për zinxhirët e furnizimit global, duke shkaktuar dënime të forta nga SHBA, Japonia dhe të tjerët.
Një version në gjuhën angleze i deklaratës kineze tha se Pekini “do të punojë me sinqeritetin më të madh dhe do të bëjë përpjekjet maksimale për të arritur ribashkimin paqësor”.
“Por ne nuk do të heqim dorë nga përdorimi i forcës dhe ne rezervojmë mundësinë e marrjes së të gjitha masave të nevojshme. Kjo është për t’u mbrojtur nga ndërhyrjet e jashtme dhe të gjitha aktivitetet separatiste,” thuhej në deklaratë.
“Ne do të jemi gjithmonë të gatshëm t’i përgjigjemi me përdorimin e forcës ose mjeteve të tjera të nevojshme ndaj ndërhyrjes nga forcat e jashtme ose veprimeve radikale nga elementët separatistë. Qëllimi ynë përfundimtar është të sigurojmë perspektivat e ribashkimit paqësor të Kinës dhe të çojmë përpara këtë proces,” thuhet në deklaratë.
Sipas Kinës, lëvizjet kërcënuese u nxitën nga një vizitë në Tajvan javën e kaluar nga kryetarja e Dhomës së Përfaqësuesve të SHBA, Nancy Pelosi, por Tajvani thotë se vizita të tilla janë rutinë dhe se Kina e përdori atë thjesht si një pretekst për të rritur kërcënimet e saj.
