Ministri i Jashtëm i Kinës, Wang Yi, tha se Shtetet e Bashkuara dhe aleatët e saj e kanë më shumë për detyrë që t’i ofrojnë Afganistanit ndihma ekonomike dhe humanitare se secili shtet tjetër, thuhet në një deklaratë të kësaj ministrie.
Kryediplomati kinez tha se Shtetet e Bashkuara dhe aleatët duhet ta ndihmojnë zhvillimin pozitiv të Afganistanit duke i respektuar sovranitetin dhe pavarësinë e tij, shkruan Reuters.
Wang shtoi se Kina do t’i dhurojë Afganistanit drithëra, vaksina, ilaçe dhe produkte për dimër në vlerën e 31 milionë dollarëve, duke shtuar se tashmë ka vendosur që të dhurojë si donacion një grup fillestar prej 3 milionë dozave të vaksinës kundër Covid-19 për popullin afgan.
Ai gjithashtu u bëri thirrje talibanëve që t’i shkëpusin lidhjet me forcat terroriste ekstreme dhe të marrin masa për t’i shtypur ato.
Ministri kinez i bëri këto komente gjatë një takimi virtual me diplomatët e shteteve fqinje të Afganistanit, bëhet e ditur në deklaratën e Ministrisë së Jashtme.