Kina vijon stërvitjet ushtarake të shkallës së gjerë në ujërat rreth Tajvanit, për të dytën ditë radhazi. Luftanije dhe avionët zhvilluan manovra ushtarake, mes tensioneve në rritje pas vizitës së zyrtares së lartë amerikane Nancy Pelosi.
Ministria e Mbrojtjes në ishull bëri të ditur se forcat e ushtrisë kineze kishin kaluar vijën e mesme, siç quhet pika në gjysme të rrugës mes Tajvanit dhe Kinës kontinentale. Tajvani, i cili e cilësoi këtë si një akt tejet provokues, u përgjigj me paralajmërime në radio dhe vuri në gjendje gatishmërie forcat e patrullimit ajror, anijet dhe sistemet raketore me bazë në bregdet.
“Dua të theksoj se ne nuk do të përshkallëzojmë konfliktin apo të nxisim përplasje, por ne do të mbrojmë me vendosmëri sovranitetin dhe sigurinë kombëtare, demokracinë dhe lirinë tonë”, deklaroi presidentja e ishullit, Tsai Ing-Wen
Të premten kryeministri i Tajvanit Su Tseng-chang tha se ishulli përfaqësonte ‘lirinë dhe demokracinë’ dhe se fqinji i keq, po tregonte muskujt në derën e tyre dhe po sabotonte në mënyrë arbitrare një prej rrugëve detare më me qarkullim në botë.
Qiejt dhe ujërat rreth Tajvanit janë bërë një pikë e nxehtë, ndërsa Pekini po përshkallëzon tensionet jo vetëm me Tajvanin po edhe me fqinjin tjetër, Japoninë. Kjo e fundit ngriti një notë proteste zyrtare ndaj kinës pasi 5 predha ranë në zonën ekskluzive ekonomike të Japonisë. Raketat ishin mes atyre që Pekini lëshoi të enjten si pjesë e stërvitjeve provokuese pranë Tajavnit, teksa Pelosi i ishte drejtuar Tokios ku u takua me kryeministrin japonez Fumio Kishida.
Gjatë një fjalimi në Japoni, zyrtarja e lartë demokrate u zotua se SHBA nuk do të lejojë që Kina të izolojë Tajvanin. Sakaq, Pekini se do të sanksionojë Pelosin dhe familjen e saj, pasi siç tha, me vizitën në Tajvan kishte ndërhyrë në punët e brendshme të Kinës, duke shkelur integritetin dhe sovranitetin territorial e duke minuar paqen dhe stabilitetin në Tajvan.
