Trajneri i Liverpoolit, Juergen Klopp është i mahnitur që skuadra e tij ka 20 pikë më shumë se skuadra e fortë e Manchester Cityt. Klopp ka thënë se nuk është i fokusuar për atë nëse skuadra e Pep Guardiolas mund ta zë Liverpoolin në garën për titull të Premier Leagues.
Klopp ka thënë se ka parë fitoren 5:0 të Cityt ndaj Burnleyt të hënën dhe se është çuditur me mbizotërimin e skuadrës nga Manchesteri. Guardiola ka bërë tetë zëvendësime në përbërjen bazë për të treguar numrin e madh të lojtarëve që ka në dispozicion.
Liverpooli do të luajë ndaj Cityt më 2 korrik, pasi ekipi i Guardiolas të përballet me Chelsean. Titullin mund të vendoset deri atëherë. Por Klopp ka thënë se i tërë fokusi i tij është te ndeshja e së mërkurës ndaj Crystal Palace.
“Ajo që pyeta kur shikova ndeshjen mbrëma është se si është e mundur që një ekip të ketë 20 pikë më shumë se ky ekip i Cityt. Kjo është e paimagjinueshme”, ka thënë Klopp të martën.
“Ne duket se kemi bërë disa gjëra vërtetë mirë dhe drejtë. Por jo, nuk mendoj për atë nëse City mund të na zë. Unë mendoj për Crystal Palacen. Unë jam i brengosur vetëm për atë se çka do të bëjmë në ndeshjen e ardhshme dhe nuk shikoj se çka po bën City. E kam shikuar këtë skuadër pasi luajmë ndaj saj pas nëntë ditësh, e jo pse kam shpresuar se do të humbas. Kam dashur që City të humbas vitin e kaluar nga Leicesteri, por kjo nuk funksionoi. Për këtë kam ndaluar të bëjë këtë”, ka shtuar Klopp.
Në edicionin e kaluar ndeshja vendimtare ishte ajo e fituar 1:0 nga City ndaj Leicester Cityt.
Palace është ekipi i fundit që ka fituar ndeshje kampionale në Anfield, në vitin 2017. Skuadra e Roy Hodgson është në seri prej katër fitoreve.
“Roy është duke bërë punë të jashtëzakonshme. Organizimi i klubit është në nivel superior, ekipi është fizikisht i fortë dhe ka qasje të duhur. Palace nuk ka pranuar gol në katër ndeshje. Është çdo gjë pozitive nga këndvështrimi i tyre, por ne kemi synime tjera”, ka theksuar Klopp.
Liverpooli i ka 83 pikë pas 30 ndeshjeve, kurse Manchester City është i dyti me 63 pikë.
