Trajneri i Liverpoolit, Jurgen Klopp, i ka shkruar një letër një tifozi 10-vjeçar të Manchester Unitedit, i cili e kishte lutur që skuadra e “Të Kuqve” të niste të humbte.

Liverpooli ka fituar 17 ndeshje rresht në Premier Ligë dhe po prin bindshëm në tabelën e ligës. I mërzitur nga kjo formë e jashtëzakonshme e “Të Kuqve”, tifozi i ri i Unitedit, Daragh Curley, i ka shkruar vetë Kloppit për t’i kërkuar dorëzim.

“Liverpooli po fiton shumë ndeshje. Nëse ju i fitoni nëntë ndeshje të tjera do të keni serinë më të mirë të ndeshjeve pa humbje në futbollin anglez. Të qenit fans i Unitedit kjo është shumë e rëndë”, ka shkruar Curley. “Andaj herën tjetër që Liverpooli luan, ju lutem humbni. Ju duhet të lejoni ekipin tjetër të humbë. Shpresoj se ju kam bindur të mos e fitoni ligën ose ndonjë ndeshje tjetër më”.

Trajneri i Liverpoolit, në anën tjetër, e ka falënderuar tifozin e “Djajve të Kuq”.

“Fatkeqësisht, në këtë rast, nuk mund të pranoj kërkesën tuaj, jo me dëshirë, të paktën”, ka shkruar Kloppi. “Aq sa ju dëshironi që Liveprooli të humbë, është puna ime të bëj çdo ditë gjithçka që mundem, që të ndihmoj Liveproolin të fitojë pasi ka miliona njerëz në botë që duan të ndodhë kjo, dhe unë nuk dua t’i zhgënjej. Me shumë siguri mund të them një gjë që kjo nuk do të ndryshojë pasionin tënd për futbollin dhe klubin tuaj. Manchester Unitedi është me fat që të ka ty”, thuhet në përgjigjen e Kloppit.

Si pjesë e detyrë shkollore, Curley dhe prindërit e tij s’kanë menduar kurrë se trajneri gjerman do të lexojë letrën, e lëre më që t’u përgjigjet.

“Gruaja ime Tricia, ishte në një zyrë poste dhe i ishte thënë se kishte një letër për Daragh Curley. Ajo ishte se habitur se kush mund t’i shkruante letër Daraghit, por kur ia kujtoi djalit, ai ka thënë ‘Oh është Jurgen Klopp’. Dhe në të vërtetë ishte Jurgen Klopp”, ka thënë babai i tij për BBC.

Liverpooli ka 22 pikë më shumë se ndjekësi i parë, Manchester City. Unitedi, në anën tjetër, është i shtati.