Evi Kokalari, aktivistja politike në SHBA, e zgjedhur si pjesë e Komisionit të Rithemelimit të PD ka reaguar pas incidentit në selinë blu, ku ajo dhe Albana Vokshi u përfshinë në debat me dy militante të Lulzim Bashës.
Në facebook, Kokalari thotë se Lulzim Basha duhet të marrë përgjegjësi për dhunën verbale, psikologjike dhe fizike të ushtruar ndaj saj dhe disa grave të tjera në ndërtesën e PD-së sot.
“Dy gra, që ishin komplet jashtë kontrollit, u munduan të na intimidonin me sharje vullgare dhe dhunë fizike, dhe Lulzim Basha që ishte në seli, nuk morri mundimin ta ndalojë për gati një orë që ishim aty, që do të thotë që Lulzim Basha ishte pjesë e këtij vullgariteti”, tha Kokalari.
Ajo thotë se Basha duhet të kuptojë që ajo do të shkojë në seli saherë ka takim, sepse është e mandatuar nga 4446 delegatë të Partisë Demokratike.
Në fund dha një paralajmërim. “Nëse herës tjetër që do jem aty, do përballem po me këtë vullgaritet, Lulzim Basha do marrë një përgjigje jo vetëm të merituar por dhe shumë agresive, që do mallkoj ditën që humbi llogjikën ndaj meje, dmth shkarkimi nga detyra dhe dosja e Nick Muzin, do të ishin vërtet problemet më të vogla që Luli do ketë ndonjëherë në jetë”.
