Më në fund Komisioni Europian njoftoi ngritjen e një mekanizmi për ndarjen e vaksinave në vendet e Ballkanit Perëndimor dhe rajoneve fqinje.
Sipas komisionerit për Zgjerimin, Oliver Varhelyi, ky mekanizëm ngrihet për të krijuar një front të përbashkët kundër pandemisë së Covid-19 dhe për të pasur qasje të hershme të këtyre vendeve në vaksinat anti-Covid.
“Për të siguruar front të përbashkët për të mposhtur Covid-19 dhe qasjen e menjëhershme të vaksinave, Bashkimi Evropian do të ngrejë mekanizëm për të strukturuar sigurimin e vaksinave anti-Covid, me vëmendje të veçantë për Ballkanin Perëndimor. Do të hulumtohet mundësia e mëtejshme për të siguruar vaksinat shpejt”, shkruan komisioneri Varhelyi.
Ora News ka mësuar më herët nga burime diplomatike se Greqia do të jetë vendi organizator i këtij mekanizmi.
Ky qëndrim i BE-së vjen pas kritikave nga Organizata Botërore e Shëndetësisë për dështim moral me shpërndarjen e vaksinës në vendet me të ardhura të mesme dhe të ulëta, apo kritikave të drejtpërdrejta të kryeministrit shqiptar Edi Rama për braktisje të Ballkanit.
