Një konferencë me deklarata të çuditshme ishte ajo e sotmja e kryetarit të Bashkisë Tiranë, Erion Veliaj dhe ministrit të Brendshëm Taulant Balla.
Të dy komentuan protestën e fundit të opozitës tek Bashkia e Tiranës, e organizuar pas plasjes së skandalit “5D”.
Fjalën e mori i pari Erion Veliaj, i cili i rikuperuar nga heqja e tëmthit, i çlodhur nga shërbimi i supës për Bajram, dhe i patrazuar nga skandali i drejtorëve “5D”, foli i indinjuar për sigurinë e jetës, për të cilën tha se nuk mund të merret me sportivitet, dhe i bëri opozitës ftesën standarde.
“Le t’i zgjidhim debatet tona si qytetarë. Nuk e djeg njeri policinë e vendit të tij nëse ka një debat për të bërë me dikë nga përfaqësuesit e politikës. Ftesa është: t’i lëmë studiot e televizionit, Parlamentin dhe Këshillin Bashkiak për debate. Siguria e jetës nuk mund të merret me sportivitet.” – tha mes të tjerash Veliaj, i cili duket sikur flet për një Shqipëri ku demokracia funksionon. Sikur përfaqësuesit e mazhorancës përballen me ata të opozitës në debate televizive, sikur në Parlament opozitës i lejohet të punojë normalisht dhe sikur në Këshillin Bashkiak opozitarët i pyet kush.
Për më tepër Veliaj bën sikur habitet që protestuesit e opozitës reagojnë me dhunë, kur ai jo vetëm nuk jep dorëheqjen për skandalin unik “5D”, por edhe lavdëron punën e drejtorëve të tij në pranga.
Më të çuditshme akoma e mbajti fjalën Taulant Balla. Ministri i Brendshëm nuk bëri më shumë se një autokritikë para gazetarëve.
Hera e fundit që nuk bëhet kallëzim i duhur penal nga policia tha Balla, ndërsa për një moment ndërroi kostum duke i treguar edhe prokurorisë se si duhet të jetë reagimi kur ka protesta. Fjalën s’kishte si ta mbyllte ndryshe, Balla uroi veten t’i shkojë mbarë.
“Ajo që ka ndodhur dje në oborrin pranë bashkisë Tiranë, ku është tentuar goditja e punonjësve të policisë, dua të jem shumë i drejtpërdrejtë me gjithkënd që ende mendon që në Shqipëri mundet të goditet një punonjës policie, do ta konsideroja si rastin e fundit që policia nuk bën një kallëzim të duhur penal, por çdo tentativë, për të goditur një punonjës policie, është një tentativë për të goditur shtetin. Dhe reagimi ynë edhe i të gjitha strukturave të tjera shtetërore, përfshirë prokurorinë, duhet të jetë ekzemplar. Kush godet punonjësin e policisë, ka goditur shtetin. Kodi penal i ka të përcaktuara qartë se çfarë dënimi meriton ai që godet punonjësin e policisë. Shumë faleminderit të gjithëve dhe na vaftë mbarë!”, e mbylli Balla.
