Nuk ka asnjë të mbijetuar nga rrëzimi i avionit të vogël privat në Turqi, ku mes 5 personave që udhëtonin në bord ishte dhe Shefi i Shtabit të Ushtrisë libiane Mohammed al-Haddad.
Avioni me delegacionin libian u rrëzua disa minuta pasi u ngrit nga aeroporti i Ankarasë në kodrën Selamalmaz, dy kilometra në jug të fshatit Kesikkavak, në distriktin Haymana.
Mediat turke raportuan se avioni pësoi një defekt elektrik menjëherë pas ngritjes dhe lëshoi një sinjal alarmi për ulje emergjente.
Ekipet e shpëtimit gjetën rrënojat e avionit pranë distriktit Haymana të provincës së Ankarasë. Zona është rrethuar dhe autoritetet turke kanë filluar operacionet e rikuperimit dhe hetimet teknike për të përcaktuar shkakun e aksidentit.
Al-Haddad ishte komandanti më i lartë ushtarak i Libisë perëndimore dhe luajti një rol vendimtar në përpjekjet e vazhdueshme të ndërmjetësuara nga OKB-ja për të unifikuar ushtrinë dhe institucionet e përçara të Libisë.
