Asgjë e rëndësishme lidhur me Ukrainën nuk do të ndodhë, derisa unë dhe putin të ulemi së bashku. Më këto fjalë presidenti amerikan ka komentuar mungesën e shefit të Kremlinit në bisedimet e paqes në Stamboll, të cilat mund të jenë të parat të drejtpërdrejta mes Kievit dhe Moskës në 3 vite. Pas njoftimit të së dielës të Putinit për mbajtjen e negociatave pa parakushte këtë të enjte në Stamboll, u shpresua se ai do të udhëtonte atje për një përballje me Zelenskin.
Por kjo nuk ndodhi, dhe në vend të tij, delegacioni përfshin këshilltarin presidencial Vladimir Medinsky dhe zv.ministrin e mbrojtjes Alexander Fomin. Trump, i cili kishte sugjeruar se do të ishte i pranishëm në bisedime në rastin se edhe Putin do të ishte u përpoq ta minimizonte mospjesëmarrjen e këtij të fundit.
“E dija që nuk do të shkonte”- tha kreu i Shtëpisë së Bardhë. “Ai do të shkonte, por mendoi se do të shkoja dhe unë”, tha Trump.
Në fakt, njoftimi i Shtëpisë së Bardhë për mospraninë e Putinit, erdhi pasi Kremlini konfirmoi se presidenti rus nuk do të merrte pjese. Mungesa e dy presidenteve ul pritshmëritë për një arritje të rëndësishme lidhur me luftën në Ukrainë.
Presidenti ukrainas Volodymyr Zelenskiy ka sfiduar Putinin të marrë pjesë nëse nuk ka frikë, në atë që duket të jetë një garë për t’i treguar Trumpit se kush e do më shumë paqen, Rusia apo Ukraina. Delegacioni amerikan në Turqi përfshin sekretarin e shtetit Marko Rubio dhe të dërguarit e posaçëm Steve Ëitkoff dhe Keith Kellogg.
