Këtë të martë Rama mblodhi në selinë rozë anëtarët e kryesisë së Partisë Socialiste dhe tashmë është vendosur që Kongresi i PS-së të mbahet vitin e ardhshëm më 29 shkurt.
Ashtu si ditën e djeshme me kabinetin qeveritar, këtë të martë Rama ka folur me socialistët mbi zgjedhjet brenda PS-së, të cilat u shtynë për shkak të ngjarjeve që pasuan tërmetin e 26 nëntorit, ku humbën jetën 51 persona.
Rama i ka dhënë urdhra të qarta deputetëve, ndërsa në dalje me median ka folur për zgjedhjet e vitit 2021, duke thënë se ato mund të duken larg, por në fakt janë fare pranë.
Rama gjithashtu ka deklaruar se mbi shpërblimin e pensionistëve për këtë fundvit dhe për amnistinë e fundvitit, do të diskutohet dhe vendoset këtë të martë në mbledhjen e qeverisë.
Rama: Pasi kemi zgjedhur kryetarët e organizatave dhe pasi kemi përfshirë në procesin e përzgjedhjes edhe gratë, duke vendosur të zbatojmë një normë të re të organizimit ku drejtimi i organizatave i besohet një burri ose djali dhe ose një gruaje apo një vajze. Tani ka ardhur koha të përmbyllim procesin për përzgjedhjen e kryetareve të partisë në 61 bashkitë e vendit. Gara do të vijojë.
Në Shkodër si po ecën procesi?
Rama: Kudo procesi ecën sipas normave të paracaktuara, sigurisht diku më shpejt, diku më ngadalë, diku më mirë apo diku më dobët. Ky proces na ka dhënë atë që kemi pritur, një energji të re dhe një përtëritje të domosdoshme. Edhe pse zgjedhjet janë larg, ato praktikisht janë nesër, pasi qershori i 2021 është afër.
A keni komunikim me Presidentin mbi kete ceshtje?
Rama: Jo, ju e dini që situata postzgjedhore karakterizohet nga një inerci dekretesh e zhdekretesh. Përsa i përket Shkodrës nuk ka një vendim dhe për fat të keq Shkodra është në situatë të rëndë në këtë aspekt. Shkodra ka një kryetare që nuk është kryetare.
Do zgjidhet kriza politike vitin e ardhshëm?
Rama: Mendoj që vendi nuk ka vakuum, sepse Kuvendi funksionon. Ne reformat po i cojmë përpara. Ne do t’i japim një shtysë shumë të fortë punëve, qoftë në aspektin e luftës kundër krimit të organizuar dhe korrupsionit, qoftë për të përfunduar një proces të stërzvarritur të çështjes së pronave. Në janar, qytetarët nuk do të jenë më të detyruar të bëjnë aplikime. Brenda 2020 të gjitha shërbimet, të paktën në aplikime, të gjitha do të bëhen online.
Ne jemi të gatshëm të ulemi në tryezë, të diskutojnë, të gatshëm të reflektojmë kur ka sugjerime dhe ide të mira. Por ne jemi zgjedhur për të qeverisur dhe jo për të pritur opozitën.
Do e dëgjoni kërkesën e opozitës së re për ndryshimin e sistemit zgjedhor?
Rama: Të gjitha idetë janë të mirëpritura, por thelbi është implementimi I rekomandimeve të OSBE/ODIHR. Kemi qenë të hapur të dëgjojmë versionet, por padyshim që zgjedhjet e ardhshme partitë nuk do të kenë gjë në dorë në komisionet zgjedhore. Votat si process do t’I besohen njerëzve që nuk kanë asnjë lloj detyrimi për partitë politike. Ka vite që kjo gjë kërkohet dhe ne do ta bëjmë./Express
