U.d. i presidentit të Kosovës, njëherërit kryetar i Kuvendit, Glauk Konjufca, ka thënë se gjykatat në Kosovë duhet t’i dënojnë kriminelët serbë edhe në mungesë.
Në homazhet te memoriali kushtuar 41 të rënëve në masakrën e Burimit në Malishevë, nderimin e përkujtimin e të rënëvë, Konjufca e ka quajtur obligim institucional.
“Është detyrë e jona t`i gjurmojmë, t`i gjejmë, por edhe t`i dënojmë kriminelët. Shteti ynë tashmë i ka të gjitha ligjet e nevojshme, si dhe mekanizmat për t`i dënuar ata që kanë bërë masakra gjithandej nëpër Kosovë. Para dy-tre viteve, siç e dini, e kemi miratur ligjin që iu mundëson gjykatave tona t`i dënojnë kriminelët serbë edhe në mungesë. Duhet të shqiptohen dënime për të gjithë ata që argumentohet se kanë bërë krime në Kosovë”, ka thënë Konjufca.
Ai ka thënë se familjarët por edhe populli nuk mund të kenë qetësi pa u vendosur drejtësia në vend.
“Jemi këtu, gjallë e bashkë, sepse dikush e ka derdhë gjakun. Ata janë rreth 14.000 qytetarë të Kosovës, të cilët janë vrarë e masakruar nga shteti okupator serb. Po ashtu janë edhe 2500 dëshmorë të cilët nën uniformë e kanë dhënë jetën për lirinë tonë”, ka thënë Konjufca, njoftoi Zyra e Presidentit përmes një komunikate.
