Nënkryetari i LVV-së, Glauk Konjufca ka pranuar nominimin si mandatar i dytë për krijimin e qeverisë nga Këshilli i Përgjithshëm i Lëvizjes Vetëvendosje.
Ai fjalimin e tij e nisi me një mesazh të fortë për kryetarin e LVV-së, Albin Kurti.
“Më lejo të siguroj që populli shumë shpejt pret që ti të rikthehesh më fuqishëm se në vitin 2021,” tha Konjufca, duke marrë duartrokitjet e shumta nga të pranishmit.
Ai shtoi se pa dyshim, Kurti ka qenë dhe do të mbetet kryeministri më i mirë që ka pasur vendi ynë.
“Problemi i nderuari kryetar Albin është që aq sa e ke gëzuar popullin me gjithë këtë mbështetje, në po të njëjtën masë ke nxitur shumë frikë te kundërshtarët e tu politikë që u bashkuan vetëm me një qëllim – të ta pamundësojnë krijimin e një qeverie për herë të tretë. Ama një gjë e dimë të gjithë, nuk ka forcë që e shkëputë apo e ndal lidhmërinë e popullit tanë me Lëvizjen Vetëvendosje”, tha Konjufca.
Me fjalë dhe obligim, Konjufca deklaroi se pranon këtë nominim dhe është i gatshëm të marrë mandatin për kryeministër.
Sipas tij, kjo përgjegjësi është një thirrje nga detyra publike:
“Këtë e bëj si thirrje nga detyra e cila na shndërron në shërbëtor të interesit publik. LVV-ja e ka definuar këtë interes në dy shtylla në rrethanat aktuale. Shmangia e dy palë zgjedhjeve të mundshme brenda tre muajsh dhe së dyti, votimin e buxhetit për vitin 2026, pa të cilin rrezikohen dimensionet vitale të qytetarëve tanë prej mbi 80 mijë pagave të sektorit publik, pensionet e shtesat e fëmijëve, deri te projektet ekzistenciale për shoqërinë tonë. Do të ishte e pafalshme nëse për shkak të tekave të partive politike e humbim mundësinë e përfitimit të benefitve qindra milionëshe duke u krekosur se po shkojmë në zgjedhje. Edhe dy procese tjera nuk na presin, RTK-ja mbet pa pagat e tyre e po ashtu nuk ka kurrfarë afat shtesë për buxhetin e tri komunave”, u shpreh Konjufca.
Çështje të tjera që janë me urgjencë për miratim tha se janë Plani i Rritjes i Bashkimit Evropian, buxheti për transmetuesin publik të Kosovës dhe buxhetet për tri komuna: Prishtina, Gjilani, Zubin Potoku.
“Partitë e tjera e kanë në dorë nëse duan të bëjmë zgjedhje tani. Por, mua më duket se shpata e gjykimit është më e mprehtë se më parë”, tha Konjufca./Telegrafi/
