Kryetari i Kuvendit, Glauk Konjufca, ka vizituar disa vatra të rezistencës çlirimtare në Kosovë dhe nderoi dëshmorët e martirët e rënë për lirinë e vendit tonë në Ditën Kombëtare të Dëshmorëve të Atdheut.
Gjatë vizitave, Konjufca tha se themelet e lirisë dhe shtetit tonë qëndrojnë mbi sakrificën e dëshmorëve.
“Sakrifica sublime e dëshmorëve të kombit qëndron e shenjtë në themelet e lirisë. Pa luftën e tyre për liri, ne nuk do ta kishim shtetin tonë e as pavarësinë. Është obligim institucional t’i nderojmë e t’i kujtojmë të rënët për liri. Ata kanë rënë në të kaluarën por nuk janë pjesë e së shkuarës, por janë shumë aktualë”, ka thënë Konjufca.
Konjufca filloi me nderime në Prekaz te varri i komandantit të Ushtrisë Çlirimtare të Kosovës Adem Jashari, për të vazhduar më pas në Kompleksin Memorial në Morinë.
Pasi vendosi lule dhe nderoi të rënët, vazhdoi në Gllogjan për të bërë homazhe në Kompleksin “Dëshmorët e Kombit”.
Nderimin për heronjtë, kryekuvendari Konjufca e përmbylli në Kompleksin Memorial “Zahir Pajaziti” në Orllan, duke vendosur lule pranë shtatores së heroit Zahir Pajaziti.