Koreja e Veriut ka lëshuar një raketë të dyshuar mbi Japoni, në atë që duket të jetë një përshkallëzim i qëllimshëm për të tërhequr vëmendjen e Tokios dhe Uashingtonit.
Raketa balistike udhëtoi rreth 4,500 km përpara se të binte në Oqeanin Paqësor, aq larg sa për të goditur ishullin amerikan të Guam nëse merrte një trajektore tjetër.
Njerëzit në veri të Japonisë, duke përfshirë ishullin Hokkaido, thuhet se u zgjuan nga zhurma e sirenave dhe sinjalizimeve me tekst që shkruanin: “Koreja e Veriut duket se ka lëshuar një raketë. Ju lutemi evakuohuni në ndërtesa ose nëntokë”.
Zyrtarët më vonë thanë se raketa balistike me rreze të mesme veprimi ra në Oqeanin Paqësor larg Japonisë dhe nuk raportohet për të lënduar.
Ky është lëshimi i parë i raketës së Koresë së Veriut mbi Japoni që nga viti 2017.
OKB-ja e ndalon Korenë e Veriut të testojë armë balistike dhe bërthamore. Fluturimi i raketave drejt ose mbi vende të tjera pa ndonjë paralajmërim ose konsultim paraprak është gjithashtu në kundërshtim me normat ndërkombëtare.
Shumica e vendeve e shmangin atë plotësisht, pasi mund të ngatërrohet lehtësisht si një sulm.
Kryeministri i Japonisë Fumio Kishida e përshkroi nisjen si “sjellje të dhunshme”, ndërsa ministri i Mbrojtjes Yasukazu Hamada tha se Japonia nuk do të përjashtonte asnjë opsion për të forcuar mbrojtjen e saj duke përfshirë “aftësitë kundërsulmuese”.
Zëdhënësja e Këshillit të Sigurisë Kombëtare të ShBA-së, Adrienne Watson e quajti atë një “vendim të rrezikshëm dhe të pamatur” që ishte “destabilizues” për rajonin.
Nisja vjen pasi Japonia, ShBA dhe Koreja e Jugut kanë punuar së bashku për të forcuar mbrojtjen e tyre, në përgjigje të kërcënimit në rritje të paraqitur nga Veriu.
Javën e kaluar, të tre vendet kryen stërvitje detare së bashku, për herë të parë që nga viti 2017. Stërvitje të tilla kanë shqetësuar prej kohësh liderin e Phenianit, Kim Jong-un, i cili i sheh ato si provë se armiqtë e tij po përgatiten për luftë.
