Ujërat vazhdojnë të jenë të trazuara në Argjentinë, pavarësisht se Albiçelestët ia dolën që të fitojnë Kupën e Amerikës për herën e dytë radhazi.
Festa e lojtarëve pas finales me Kolumbinë ka sjellë polemika pasi ata kënduan në autobus një këngë që në thelb është kor racist kundër lojtarëve francezë. Ishte Enzo Fernández ai që drejtoi korin dhe e bëri këtë në një transmetim live në Instagram, ndaj klubi i Chelsea ka nxituar të nisë një hetim për çështjen dhe pritet penalizim për mesfushorin.
Tashmë skandali ka marrë përmasa edhe më të mëdha pasi qeveria argjentinase i ka tërhequr veshin edhe kapitenit, Leo Messi, edhe pse më pas është mbrojtur duke e mohuar këtë gjë.
Messi në asnjë moment nuk u shfaq gjatë transmetimit të drejtpërdrejtë të Fernandez, por nënsekretari i Sporteve të Argjentinës, Julio Garro, ka deklaruar publikisht se Messi dhe Chiqui Tapia, president i AFA-s (Asociacionit të Futbollit Argjentinas), duhet të kërkojnë falje për ato thirrje raciste dhe homofobike.
“Kapiteni i Kombëtares duhet të dalë dhe të kërkojë falje. Njësoj si presidenti i FAF-së. Kjo na lë ne si shtet në një pozitë të keqe pas lavdisë”, ka pranuar politikani për median ‘Corta’.
Zhurma që shkaktuan deklaratat e Julio Garros ka qenë tepër e madh, aq sa më pas në llogarinë e tij në platformën ‘X’ ai duhej të cilësonte fjalët e tij duke mohuar se i kishte kërkuar Messit që të kërkonte falje.
