Qeveria paralajmëron lehtësim të masave parandaluese pas një majit. Kryeministri Oliver Spasovski tha se Qeveria është duke përgatitur një plan serioz për kthimin e jetës në normalitet.
“Po bëhet një plan se si të fillojmë lehtësimin e disa prej masave pas 1 majit, në mënyrë që të mund të kthehemi në normalitet. Konsideruam se masat e distancës fizike japin rezultat, kështu që kishte vendime për të mos punuar në shkolla, kopshte, shumë kompani nuk funksionuan, përfshirë ato në mikpritjen, turizmin”, deklaroi Oliver Spasovski- kryeministër i Maqedonisë së Veriut.
Në këtë drejtim edhe ministri i Shëndetësisë Venko Filipçe, shprehu optimizëm se masat e ndërmarra deri më tani po japin rezultate dhe se pas stuhisë do të lind dielli., megjithatw se shtoi se gjithçka do tw ndodhe gradualisht.
“Pas stuhisë, del dielli. Jeta së shpejti do të kthehet në normalitet edhe pse kjo nuk do të ndodhë menjëherë. Konsideroj se të gjitha masat qe kemi ndërmarr për kufizim të lëvizjes, transporti publik i kufizuar, kapacitetet prodhuese, që të mundësohet distancë fizike e nevojshme, tani japin rezultat. E gjitha kjo na solli në situatë që të kemi rritje lineare të pacienteve dhe jo masive, siç ndodhi në Spanjë, dhe të mos kemi kolabim te sistemit shëndetësor”, tha Venko Filipçe- ministër i Shëndetësisë.
Sa i takon raportit për 24 orët e fundit në vendin tonë, rezulton se betejën me virusin korona e kanë fituar edhe 25 persona të tjerë, kjo e çon numrin e përgjithshëm të të shëruarve në 164. Ndërsa gjendja e përgjithshme shëndetësore e 6 personave është e mirë, andaj të njëjtët janë lëshuar për kurim shtëpiak. Raste të reja janë 53, shtrirja gjeografike e të cilave është në 8 qytete. Numri i përgjithshëm i të infektuarve shkon në 1170, 71, 8% prej të cilëve ndodhën në 3 qytete, Shkup, Kumanovë dhe Prilep. Ndërsa gjithsej të infektuar ka në 21 qytete të Maqedonisë së Veriut. Të sëmurët janë nga mosha zero deri në 91 vjeç. Më e prekur është grup mosha nga 50-59 vjeç.
Deri tani janë bërë 11 556 teste. Testimit i janë nënshtruar edhe fëmijët e shtruar në sektorin për hematologji dhe prindërit e tyre. Të gjithë kanë rezultuar negative. Në mënyrë parandaluese do të testohen edhe të punësuarit në Klinikën Universitare për sëmundje të fëmijëve edhe pse deri tani nuk ka të infektuar apo të dyshuar./Alsat/
