Pandemia, COVID 19 vazhdon të përhapet gjithandej, pavarësisht masave të shumta parandaluese që në mënyrë të sinkronizuar po i zbatojnë vendet e prekura. Numri i të infektuarve në botë ka mbërritur në rreth 870 000 ndërsa mbi 43 000 kanë humbur jetën.
Pos Italisë, me numër të madh viktimash po përballen edhe SHBA-ja e Spanja. Derisa Spanja për 42 orë shënoi 864 viktima, po kaq shënoi SHBA-ja vetëm për 24 orët e fundit. Kjo e shtyu Presidentin, Donald Trump t’i paralajmërojë amerikanët se do të përballen me javët më të vështira në histori.
“Do të jenë dy-tre javë të ashpra. Do të jenë dy-tre javët më të ashpra që kemi pasur ndonjëherë në shtetin tonë, do të humbasim mijëra njerëz. Dëgjoj se dje 29 njerëz kanë vdekur në Nju Xhersi, 173 në Nju Jork. I shohim numrat e viktimave. Asnjëherë më parë nuk kemi parë numra të këtillë! Është lehtë të jemi pesimist, por unë jam lideri i shtetit dhe dua të bëjmë punë të mirë. Dua të vdesin numër më i vogël i mundshëm i njerëzve dhe për këtë po punojmë”, tha Trump.
Ndërkohë ashtu si Gjermania edhe Britania e Madhe synon ta kopjojë modelin e Koresë së Jugut të parandalimit të pandemisë, përmes testimeve masive, 25 000 në ditë. Gjermania, Franca, Irani, Britania e Madhe vazhdojnë të mbeten pas Kinës në listën e shteteve më të prekura në botë.
Nga shtetet fqinje, Shqipëria ka 16 viktima nga 259 të infektuar, Kosova 1 viktimë dhe 112 të prekur, Serbia 23 viktima, 900 të infektuar, Greqia 49 viktima nga mbi 1300 të infektuar, ndërsa Bullgaria 8 viktima nga 400 të infektuar, por pasi njëri prej deputetëve doli pozitiv pritet që ditëve të ardhshme testit për COVID 19 t’i nënshtrohen të gjithë 240 deputetët bullgarë.
Ndonëse mbi 40 institucione shkencore në botë po përpiqen të gjejnë vaksinën kundër Koronavirusit, akoma nuk dihet se kur këto përpjekje do të kenë sukses. Nga ana tjetër, shkaku i masave parandaluese, në shtete të ndryshme tashmë kanë filluar të shfaqen përfitime: është pastruar ajri në Indi, në një nga 30 shtetet më të ndotura në botë, ndërsa në Australi u shuan zjarret mbi 200 ditëshe. E në kornizë të solidaritetit ndër-shtetëror, pas mjekëve që Shqipëria i dërgoi Italisë, aeroplanë nga Rusia ateruan për në SHBA me paisje mjekësore, ndërsa Tajvani do t’ua donojë 10 milion maska shteteve më të prekura dhe pret që së shpejti të jetë në gjendje të prodhojë 15 milion maska në ditë.
