Kosova duhet të krijojë sa më parë qeverinë e re në mënyrë, në mënyrë që të punohet për zbatimin e rekomandimeve të Raportit të Progresit.
Kjo thirrje erdhi nga ambasadori i Bashkimit Europian, Aivo Orav në Prishtinë, i cili, pasi i dorëzoi raportin kryeministrit në detyrë, Albin Kurti, ia bëri të qartë se për shkak të ngërçit politik, Kosova e humbi një vit.
“Po e them këtu hapur, për t’iu ndihmuar ju që të bëni përparim në raport me integrimin europian, neve na duhen partnerë. Na duhet një qeveri me të cilën do të bashkëpunonim, me një shumicë në Kuvend, e aftë të avancojë liritë themelore në të mirë të popullit të Kosovës. Në këtë drejtim, fatkeqësisht ka qenë një vit i humbur”, shprehet Aivo Orav, ambasador i BE-së në Kosovë.
Orva kujtoi se vitin e kaluar, Kosova ishte e para në axhendën e reformave, shumë marrjes së pjesës së parë të fondeve të Planit të Rritjes të Bashkimit Evropian për Ballkanin Perëndimor, e kishte bërë përparim në një sërë fushash.
“Dua të them se elita politike në Kosovë duhet të bashkohet përtej ndarjeve politike dhe etnike dhe të formojë një shumicë të fortë në Kuvend që do të siguronte ratifikimin e Planit të Rritjes dhe të avanconte në obligimet tuaj sipas dialogut mes Kosovës dhe Serbisë. Pa këtë, do të ketë humbje të mundësive të tjera”, shton më tej Orav.
Fushat në të cilat Kosova ka bërë përparim konsiderohen funksionimi i gjyqësorit, kapaciteti për t’i bërë ballë presionit në treg, zhvillimet në politikat e punësimit, politikat e ushqimit dhe raportet me jashtë, por ka ende punë për të bërë në luftën kundër korrupsionit, është urgjente që të miratohet strategjia kundër korrupsionit, sipas standardeve të BE-së e liria e shprehjes duhet të përmirësohet.
