Qeveria e Maqedonisë ka marrë një vendim që shtetasit nga Franca, Gjermania, Spanja, Irani, Italia, Kina e Koreja e Jugut, as nuk mund të hyjnë e as të dalin nga Maqedonia. E krejt kjo si masë për të parandaluar përhapjen e koronavirusit COVID-19 në shtetin fqinj.
KOHA ka mësuar se Maqedonia nuk po i lejon as kosovarët me pasaporta të shteteve të sipërpërmendura që të kalojnë pikat kufitare, ndërkaq ata me pasaporta të Kosovës mund të kalojnë.
Xhelal Sveçla, zëvendësministër në Ministrinë e Punëve të Brendshme, e ka konfirmuar këtë për KOHËN duke theksuar se kjo ka të bëjë me pikat kufitare Kosovë-Maqedoni e Veriut.
“Po, është vendim i qeverisë maqedonase. Kam njohuri vetëm për pikat e përbashkëta kufitare”, u shpreh Sveçla.
Pikat kufitare të Maqedonisë me Kosovën janë Hani i Elezit, Glloboçica dhe Bellanoci.
Ndërkaq, mësohet se ky vendim do të qëndrojë deri në një vendim të radhës nga pala maqedonase.
