Komisioni Qendror i Zgjedhjeve (KQZ) ka njoftuar se deri në orën 21:30 të ditës së sotme është përmbyllur procesi i verifikimit dhe numërimit të votave në 21 Qendra Komunale të Numërimit (QKN).
Zëdhënësi i KQZ-së, Valmir Elezi, bëri të ditur se procesi ka përfunduar në këto komuna: Hani i Elezit, Junik, Mamushë, Zveçan, Mitrovicë e Veriut, Zubin Potok, Deçan, Shtime, Klinë, Shtërpcë, Obiliq, Istog, Skenderaj, Viti, Rahovec, Suharekë, Dragash, Kaçanik, Lipjan, Fushë Kosovë dhe Ferizaj.
Elezi sqaroi se në Qendrat Komunale të Numërimit po zhvillohen tre aktivitete kyçe:
- Verifikimi i rezultateve nga zgjedhjet për Kryetarë të Komunave.
- Verifikimi i rezultateve të subjekteve politike nga zgjedhjet për Kuvende Komunale.
- Numërimi i votave të kandidatëve për anëtarë të Kuvendeve Komunale.
KQZ njoftoi se rezultatet nga Qendrat Komunale të Numërimit po prezantohen vazhdimisht në platformën zyrtare, duke përditësuar të dhënat vendvotim pas vendvotimi.
