Alsat12.09.2020 14:36
Moratoriumi 1 vjeçar i Kosovës për mosaplikim në organizata ndërkombëtare po konsiderohet si pezullim i shtetit për këtë periudhë.
Dy partitë opozitare, Lëvizja Vetëvendosje dhe Partia Demokratike e Kosovës, po thonë se ky vendim është shumë i dëmshëm, pasi Kosova po heq dorë nga politika e jashtme. Ndërkohë kryeministri Avdullah Hoti ka theksuar se ky afat 1 vjeçar është vënë për të shfrytëzuar arritjen e një marrëveshje finale me Serbinë.
Vetëvendosje vlerëson se Hoti në mënyrë të vullnetshme ka hequr dorë nga njohja e vendit.
Të ashpër për këtë vendim të qeverisë Hoti u shprehën edhe nga tabori i PDK-së. Kosova vitet e fundit nuk ka mundur të bëhet pjesë e asnjë organizate ndërkombëtare.
Vendi dështoi të anëtarësohet në UNESCO dhe Interpol. Ndërkaq përveç njohjes së fundit nga Izraeli, Kosova në dy vitet e fundit ka pasur regres sa i përket njohjeve zyrtare nga shtetet tjera.
