Ministrja e Ekonomisë së Kosovës, Artane Rizvanolli, ka dëshmuar në Prokurorinë Speciale. Avokati i saj, Artan Çerkini, ka thënë se ministrja është dëgjuar në cilësinë e dëshmitares.
“Ministrja Rizvanolli është dëgjuar në cilësinë e dëshmitares. Prokurori ka lexuar një paralajmërim për shkaqe të hetimeve, detajet e hetimeve nuk duhet të behën publike, ngase çdo publikim paraqet vepër penale. Më shumë se kaq nuk mund të themi më shumë. Rizvanolli është dëgjuar në cilësinë e dëshmitares”.
Prokuroria Speciale, përmes një komunikate ka bërë të ditur se intervistimi i saj është bërë me ftesë të kësaj prokurorie, për një çështje penale të cilën e ka në hetim.
“Prokuroria Speciale informon se sot, ministrja Artane Rizvanolli, është paraqitur në Prokurorinë Speciale me ftesë të kësaj prokurorie. E njëjta është duke u intervistuar në cilësinë e dëshmitares për një çështje penale, të cilën kjo prokurori e ka në hetim”.
Gjatë së martës deputetët e opozitës nga Komisioni Hetimor Parlamentar për tekstet shkollore, kanë dorëzuar kallëzim penal në Prokurorinë Speciale, pasi sipas tyre janë gjetur shkelje në procesin e subvencionimit.
