Ndonëse mban emrin e një diktatori që në shumë vende të botës është i ndaluar, për Hitler Kurtin nuk ka asnjë pengesë ligjore që të mbajë pozicionin e këshilltarit bashkiak në Mat. Për Klan News, e konfirmon edhe Komisioni Qendror i Zgjedhjeve.
“Për Kodin Zgjedhor dhe ndonjë ligj tjetër, nuk ka ndalim për këtë person për t’u regjistruar si kandidat dhe për të marrë mandat si këshilltar. Mbajtja e këtij emri është tërësisht çështje personale e këtij individi”.
27-vjeçari rezulton pa precedentë penalë, por ai mban emrin e njeriut që sulmoi botën gjatë Luftës së Dytë Botërore dhe zhduku miliona hebrenj në dhomat e gazit në Gjermani.
Në Shqipëri, në vitin 2002 janë bërë ndryshimet e para në ligjin e Gjendjes Civile të emrave të ndaluar për fëmijët. Por, edhe në këtë listë sanksionesh, emri Hitler nuk rezulton i ndaluar. Bazuar mbi këtë ligj, Komisioni Qendror i Zgjedhjeve ka miratuar emrin e tij në listën e kandidatëve për këshill bashkiak.
Hitler Kurti ka bërë fushatë duke marrë edhe besimin e qytetarëve nën siglën e Partisë Fryma e Re Demokratike. Ai ka marrë 545 vota ose mbi 4.2% te votave duke fituar kështu edhe mandatin e vetëm nga kjo forcë politike për këshillin.
