Kryetarja e KQZ-së, Valdete Daka, ka thënë se në zgjedhjet e 14 shkurtit do të jenë 1.794.826 qytetarë me të drejtë vote.
Sipas asaj që tha në mbledhjen e KQZ-së, që po vazhdon ende, janë 143.006 më pak se në zgjedhjet e 6 tetorit 2019.
Arsyeja se përse ka më pak votues në këto zgjedhje është për shkak se KQZ-ja ka vendosur që t’i largojë nga lista votuese 122 mijë e 421 persona të cilët posedojnë vetëm dokumente të identifikimit të lëshuar nga UNMIK-u. Sipas KQZ-së, dokumentet e UNMIK-ut nuk shërbejnë për t’u identifikuar në vendvotim në ditën e zgjedhjeve.
Po ashtu, KQZ-ja ka larguar nga lista votuese edhe 11 mijë e 86 persona të cilët janë konfirmuar se janë larguar nga skema pensionale për shkak se kanë vdekur.
Numri i Qendrave të Votimit në të gjithë Kosovën është 888, me gjithsej 2 mijë e 382 vendvotime.
