Kryekomisioneri Ilirjan Celibashi, gjatë prezantimit të raportit vjetor të KQZ-së në komisionet parlamentare, deklaroi se vetëm 50 nga 132 parti politike dorëzuan raportet financiare për vitin 2023, ndërsa të tjerat janë sanksionuar.
“Janë 82 parti politike të cilat ekzistojnë si të tilla vetëm në regjistrin përkatës të partive politike pranë Gjykatës së Rrethit Gjyqësor Tiranë, por realisht nuk ekzistojnë. Kjo mendoj që do duhet të ketë adresim ligjor,” tha z. Celibashi.
Përmes Oerd Bylykbashit, opozita ngriti shqetësimin për dështim me votën e diasporës.
“Nëse ka diçka që e ka dëmtuar në mënyrë të pariparueshme, kam frikë, perceptimin për votën e diasporës, është vota me postë. Dështim katastrofik!” deklaroi deputeti demokrat, z. Bylykbashi.
“Jam i bindur dhe nuk është se dua të sfidoj kënd kur them që votimi nga jashtë ishte një sukses me gjithë problematikat,” u shpreh kryekomisioneri Celibashi.
Mazhoranca kërkoi zgjidhje urgjente për personat me aftësi ndryshe dhe që nuk mund të votojnë dot.
“Ironia më e madhe në sistemin shqiptar është që ne bërtasim për të drejtat e votuesve të diasporës, por harrojmë që kemi 40–50 mijë shqiptarë me aftësi të kufizuara. E kanë të pamundur të votojnë… dhe ne kujdesemi t’u çojmë zarfin në Amerikë apo Kanada,” tha deputeti socialist Damian Gjiknuri.
Për procesin e numërimit të votave, kreu i Komisionit të Ligjeve, Ulsi Manja, tha se tani nuk ka më arsye që numërimi të bëhet në KZAZ.
“Sot, në kushtet e zhvillimit të kësaj teknologjie dhe e monitorimit në qelizë të çdo veprimtarie që zhvillojnë individët apo subjektet, ne të vazhdojmë të kemi numërim në qendra grumbullimi,” deklaroi z. Manja.
